Tuai rumah dipinta ngerah rayat nyukung perintah Tu beguna amat dikena nentuka agenda pemansang ulih dikemujur ke pemaik rayat
MIRI: Ketuai raban bansa nyengkaum bala tuai rumah dipinta bejalaika tanggungpengawa ke chukup besai iya nya ngerah nembiak redak ke dijaga terus meri sukung ngagai perintah ba pengawa bepilih besai (PRU) tu ila.
Sapit Menteri Pemansang Menua Pesisir enggau Kandang Menua, Datuk Alexander Nanta Linggi madah dikena nentuka perintah diatu enggau opis menteri ulih neruska agenda pemansangka ba tumpuk pendiau, lebih agi ba nengeri tu, sukung penuh ari rayat ba renggat baruh, chukup beguna ngambika ketuai ke megai diatu terus merintah.
“Nya alai, laban ke nyadi ketuai ba renggat tumpuk pendiau, aku nesau tuai rumah enggau ketuai tumpuk pendiau bejalaika tanggung- pengawa diri ngerah rayat ngambika terus meri sukung penuh ngagai Barisan Nasional (BN) ba pengawa bepilih besai ke deka datai.
“Tu beguna amat dikena nentuka agenda pemansang ke diperambu kitai ulih dikemujur ke pemaik semua rayat,” ku iya seraya madah sukung penuh nya ila deka nentuka perintah BN ulih nyapai juluk nempa Malaysia nyadi menua maju ba taun 2020.
Nya alai, udah nya rayat deka nyadi komuniti ke ulih besemekih dalam ngemujurka Transformasyen Nasional (TN) 2050.
Alexander madah tanggungpengawa ke sebaka mega dipejalaika semua sekretari politik genap sitak ke sebaka baik nya Parlimen tauka Kunsil Nengeri (DUN) ba serata nengeri, dalam bejalaika tanggungpengawa dikena nentuka pemujur polisi-polisi ke dipejalai perintah.
Iya madah munyi nya rambau nutup Program Sijil Tadbir Urus Desa INFRAUniKL Fasa 2, Zon Sarawak, ke diatur ba sebengkah hotel tebilang ditu, kemari.
Program nya dipejalai nengah Institut Kemajuan Desa (INFRA) baruh pegai Opis Menteri Pemansang Menua Pesisir enggau Kandang Menua (KKLBW) begulai enggau raban pengelandik ari Universiti Kuala Lumpur (UniKL).
Ba jaku iya mega, Alexander bisi ngansak bala komiti pemansang enggau pengelikun genturung pendiau (JKKK) ngemeratka juluk Menteri Besai, Datuk Seri Najib Tun Razak, ti keranka sida ngelala peminta nembiak redak.
“Berebak enggau nya kita patut bejalaika pengawa ngemetulka peragam peranak tumpuk pendiau ngagai perintah ba jeman ‘perang politik’ enggau raban ti nadai nemu tanggungpengawa diri, nengah chara nyerenih penerang ke betul bekaul enggau sesebengkah isu ngambika perintah enda dikutuk ketegal pengawa politik,” ku iya.
Alexander mega minta ketuai JKKK mansik dulu berita ke bisi ayan ba media rama kelimpah belajar nguna perengka guna baru nya dalam napi peragam ke enda betul.
“Kepenudi endar, JKKK patut nemu maya minta sesebengkah utai ari perintah lalu nemu dalam ngemansangka sesebengkah menua, perintah beguna timpuh sereta napi mayuh pemar,” ku iya.
Iya andal nyema JKKK ngemeratka pekara ke udah disebut nya nyadi sida ulih nentuka kuing pemansang tumpuk pendiau ba menua pesisir ngagai tikas ke lebih manah dudi hari.
“Pengeransing kita ngulu Program ‘Sijil Tadbir Urus Desa’ tu ngelai pengeran kita deka meda ubah dudi hari ungkup tumpuk pendiau diri ngambika lebih nyulut,” ku iya.
Sama bisi datai iya nya Menteri Muda Orang Indu, Ruang Bilik enggau Pemansang Anak Mit , Rosey Yunus; Direktor INFRA, Datuk Rubiyah Abdul Rahman; Direktor Palan Pemansang Ekonomi Menua Pesisir UniKL, Prof. Sulaiman Sajilan sereta pengari Direktor Unit Pengatur Opis Kepala Menteri, Norlela Jarnie.
Nya alai, laban ke nyadi ketuai ba renggat tumpuk pendiau, aku nesau tuai rumah enggau ketuai tumpuk pendiau bejalaika tanggungpengawa diri ngerah rayat ngambika terus meri sukung penuh ngagai Barisan Nasional (BN) ba pengawa bepilih besai ke deka datai. Datuk Alexander Nanta Linggi Sapit Menteri Pemansang Menua Pesisir enggau Kandang Menua