Opis Duta Malaysia di Pyongyang deka ditutup
KUCHING: Perintah Malaysia merambu deka ngena Opis Duta Malaysia di Beijing, mutarka pekara ke bisi bekaul entara Malaysia enggau Korea Utara.
Menteri Menua Luar Datuk Seri Anifah Aman madah pekara tu berindik ari pemutus perintah nadai agi muka tauka nganjung duta Malaysia bepalan di Pyongyang.
“Diatu, kami (Opis Menteri Menua Luar) udah nganjung sadang kami ngagai Kabinet , alai Wisma Putra udah ngaga surat ngagai kabinet madah ke barang pekara ke bekaul enggau Pyongyang deka putarka ari Beijing.
“Kami nadai perambu deka nganjung duta ngagai Pyongyang.
“Malaysia nyangka mutus tauka nyambung kaul menua tu enggau Korea Utara, tang ngemendarka Opis Duta Malaysia di Beijing ngemutarka sebarang pekara diplomatic tauka pengawa bukai ke bisi bekait enggau Korea Utara ari Beijing ,” ku Anifah madah lebuh dikerandau pengudah nguluka randau bekait enggau ‘Issues and Challenges in Managing Malaysia’s Foreign Relations’ ke digulu ulih urung 1,500 nembiak universiti enggai ketuai ejensi ois perintah di DeTAR Universiti Malaysia Sarawak (UNIMAS) ditu, kemari.
Kena 28 Setember tu tadi, opis menteri nya bisi ngeluarka surat tauka jaku nagang rayat Malaysia bejalai ngagai Korea Utara.
Tagang nya, ku opis menteri nya madahka benung bejalai diatu datai ngagai maya iya ila, tagang nya deka diketuka.
Ba randau enggau nembiak universiti nya kemari, Anifah madah atur nya digaga berindik ari penyarut ke nyadi entara kededua buah menua tu berindik ari seiku rayat Korea Utara (ke bisi kaul enggau sida sebilik ke megai Perintah di Korea Utara) dibunuh di Padang Bilun Entarabansa Kuala Lumpur, kena 13 Februari taunt u tadi.
Kes nya diatu benung ditasat sereta dibechara ba kort di Malaysia.
“Ketegal kes bansa nya, mayuh jaku orang nimbal pasal kes nya (ke nadai kaul enggau kes nya), lalu sekeda jaku ke enda berapa manah di dinga, ngeletakka penuduk Malaysia dalam gaya ke enda manah,” ku iya ke ngelalau mensia mayuh badu agi ngaga penuduk kes nya majak charut ke tau ngasuh laya majak panjai.
Ba lansa bukai, Anifah mega ditanya pasal pemansang Perin- tah Malaysia ke minta Amerika ngemunaska visa ke rayat Malaysia ke deka raun, tauka bedagang di menua nya.
Kediatu, rayat Malaysia ke deka raun, belajar tauka bedagang di menua nya, enda tau enda minta visa ari Opis Duta Amerika Syarikat di Kuala Lumpur, lalu visa tu bebayar, dalam penyampau RM550 sepala.
“Perintah benung ngemutarka pekara tu, alai bisi tujuh bengkah atur ke dipinta Amerika Syarikat ari Malaysia ke enda tau enda digaga (kena ngemunaska visa), kediatu, 6 iti pekara udah dikemutarka, semina nganti siti agi.
“Aku enda entu irau ati pasal ngemunaska visa tu, agi ulih (bertolak ansur), taja pan visa ke pengawa dagang enggau menua nya, mayuh atur ke diberi…Meri pan kitai, nyangka bisi siti, dua pekara ke deka di tulak ila, laban bisi sekeda atur nya enda tau enda di ubah. Taja pia, kami nitihka proses ke dipinta Amerika Syarikat,” ku iya.