Tasik China Selatan chukup beguna ngagai selampur menua ASEAN

KOTA SAMARAHAN: Tasik China Selatan entara kandang tasik ke chukup beguna ukai semina ngagai Malaysia, tang nyengkaum selampur menua ASEAN.

Kandang tasik nya diperebut ketegal pengawa dagang entarabansa nyengkaum sida ari China.

Menteri Menua Luar Malaysia, Datuk Seri Anifah Aman madah sebarang pemansang ke bisi peluang ngachau pengelikun, deka meri empas ke besai ngagai dunya, alai, penanggul berebutka sitak tasik tu enda tau enda diputar manah, sereta nyeliahka sebarang penyarut tauka laya enggau menua ASEAN lebih agi China.

“Malaysia mega bisi kaul enggau Tasik China Selatan dalam napi pekara ke sensitif. Nya alai, peminta ba Tasik China Selatan patut diputar nengah chara ke likun sereta nitih atur undang- undang entarabansa ke betul, baka ke ba UNCLOS 1982,” ku Anifah.

Iya madah munyi nya lebuh bejaku ba pengawa ‘Issues and Challenges in Managing Malaysia’s Foreign Relations’ ti digulu urung 1,500 nembiak UNIMAS enggau ketuai ejensi opis perintah ba Dewan DeTAR di UNIMAS ditu, kemari.

Iya madah, Brunei Darussalam, Filipina, Vietnam, enggau China empu ngaga kelim ba sitak maritim ke mandangka sitak nya mega dituntut Malaysia, laban semak enggau Sabah enggau Sarawak.

“China nuntut Tasik China Selatan ba sentang semua kandang tasuk Malaysia ke enda jauh ari Sabah enggau Sarawak.

“Malaysia enggai ngaku tauka enggai ngelala kandang tasik ke dituntut China nya laban enda sebaka enggau undang- undang entarabansa nyengkaum ‘The United Nations Convention on the Law of the Sea 1982 (UNCLOS),”ku iya.

Taja pia, iya madah, Malaysia terit enggau tuntut ti madahka pemerat ngetanka pengelikun ba kandang Tasik China Selatan nya.

“Malaysia betatika semua ( tuntut nya) nitihka atur ‘Declaration of Conduct of Parties’ (DOC) ngaga, ngetan sereta ngemanahka agi penemu diri, arap sereta bejalaika pengawa baum pasal pekara nya enggau manah,” ku iya.

Malaysia mega minta aum tauka jurai pasal,’Code of Conduct’ ( COC) di Tasik China Selatan nya digaga enggau jampat.

ASEAN nyadi siti ari pemerat polisi menua luar sereta ASEAN mega nyadi pemerat ke China.

Nya alai, Malaysia enggau China enda tau enda beratika kaul tauka mutarka pekara tu, enggau chara menangmenang entara sapa-sapa ke bisi ati, ngetanka pengelikun sereta pengelantang ba kandang Tasik China Selatan,” ku iya.

Sama bisi datai Direktor Besai ( Pengatur Perambu Polisi) Opis Menteri Menua Luar, Duta Bala Chandran Tharman, Direktor Besai Pekara bekait enggau Maritim, Opis Menteri Menua Luar, Dr. Azfa Mohamad. Mustafar, enggau Mandal Canselor UNIMAS, Dato Mohd Kadim Suaidi.