Dr Chella entara chalun PDP ke ngining penuduk Saratok
KUCHING: Pelobi chalun penuduk Parlimen Saratok ungkup Pengawa Bepilih Besai ke-14 (PRU 14) ke deka datai, Dr. James Chella udah lama bejalai nempa kaul enggau rayat Saratok.
Dr. Chella ari Parti Demokratik Progresif (PDP) seruran regas betemu enggau rayat, datai ngelalaka diri empu, nyadi pelobi ungkup penuduk parlimen Saratok.
Bedau lama tu tadi, Dr. Chella, ti mega gawa nyadi lutur, bisi nemuai ngagai Rh Mawan, Kawit, Saratok, lalu begempuru enggau mensia mayuh seraya minta sukung penuh ari komuniti dia, nyema iya dipilih bediri nengah parti PDP.
Dalam jaku iya, madahka pemerat tuju iya minta pilih rayat Saratok, laban iya deka mai mayuh agi pemansang ngagai Saratok, baka infrastruktur, ekonomi, enggau pelajar.
“Enti deka nyapai semua pemansang tu, aku begunaka sukung kita, ngambika parti ulih ngambi aku nyadi chalun ungkup rayat Saratok.
“Lalu enti aku dipilih, lalu menang dalam PRU 14 tu, aku sigi enda ninggalka rayat Saratok,” ku iya.
Pengawa nya digulu lebih 100 iku orang nyengkaum Sekretari PDP Saratok, Cr. Noel Tom, Chairman PRS Kalaka-Kabong, Cr. Roland Jang, Kaban Opis Kunsil Saratok, Cr. Rabaie Sulai, Sapit Ketuai Nembiak PDP Saratok, Cr. Marshall Robert, Speaker PDP Saratok, Robert Kubu.
Ba lansa bukai, Kubu madahka Dr. Chella sigi udah suah ngatur program betemu enggau rayat Saratok bepun ari taun siti nyin tadi, lalu naka kediatu, timbal ari mensia mayuh di Saratok chukup manah.
“Dr. Chella nerima timbal ke manah ari rayat Saratok, laban sida endang ngandalka iya ulih nyadi chalun ba PRU tu ila,” ku Kubu.
Sitak Parlimen Saratok diatu, agi mengkang dipegai ex-presi- den TERAS, Tan Sri William Mawan anak Ikom ( baru sepenggal) ti nadai parti.
Maya PRU ke-13 tu tadi, Mawan bediri nengah chalun terus BN.
Ba pun taun tu tadi, Mandal presiden Kanan PDP, Datuk Paul Igai bisi madahka maya PRUke-14tuila, Mawandipelabaka enda agi ngetanka kerusi iya laban iya (Mawan) ukai ari sebarang komponen BN.
Iggai melabaka ke PRU ke-14 tu ila, nyangka Mawan deka ditingkilka ari bediri ngetanka penuduk Saratok, laban Saratok, enti nitih sigi ungkup PDP, lalu dalam semangat BN, penuduk nya enda tau enda pulai ngagai PDP, ke kala dikelala enggau nama Parti Demokratik Progresif Sarawak (SPDP).
Iya mega madahka, laban ke nyadi siku ari kaban kanan PDP enggau BN, iya minta penuduk nya dipulaika ngagai PDP.