Polis dipinta lengkas mutar kes tipu ‘online’ SUPP Senadin ngelaluka NGO mantu mantaika isu ti bisi nuntung komuniti
Padah jampat nyema kes mujur diputar laban mayuh orang rugi besai ketegal sindiket nya
MIRI: Piak polis dikearap ulih lengkas mutar kes tipu chara ‘online’ (scam) ti ngujungka mayuh orang di bagi menua tu kena tipu sereta rugi besai ketegal sindiket nya.
Menteri Muda Dagang Temuai, Seni enggau Main Asal Datuk Lee Kim Shin madah, iya minta polis meri timbal nyema sesebengkah ripot ke digaga mujur diputar.
“Aku enggai meda kes tu kelalu lama, polis patut lengkas bejalaika pengawa, sidi orang ke menggi akaun bejalaika sindiket nipu nya.
“Mensia mayuh mega aku deka nangkan, anang jampat arapka jaku manis sida ke baru dikelala nengah media rama taja kangau telefon ke ngujungka kita sanggup meri duit nitih pinta sindiket nya,” ku iya nengah sebengkah penerang media ba Indu Opis Polis Pelilih (IPD) Miri, lemai ensanus.
Bela datai, Ketuai Polis Pelilih Miri Asisten Komisioner (ACP) Lim Meng Seah enggau Ketuai Opis Pemansik Penyalah Besai (JSJK) Asisten Superintendan (ASP) Adianto Mudin.
Tandu Lee ke mega Kaban Kunsil Nengeri ( ADUN) Senadin, Biro Sebana Mensia Mayuh Parti Sa’ati Rayat Sarawak ( SUPP) Senadin betuaika Eric Chin mega bisi nerima mayuh sebana bekaul enggau Macau,’ ‘Love’ sereta ‘Parcel Scam’ tu.
Entara sebana ke bisi diterima nyengkaum ngumbai diri ditan ba Padang Bilun Antarabansa Kuala Lumpur (KLIA).
Orang ti kena tipu siku bini orang ti nadai gawa peranak menua tu, bekelala enggau siku lelaki ari Amerika Syarikat nengah media rama.
Lelaki nya madah diri udah nyual keresa ba menua asal lali mai duit AS$1.8 juta ke Malaysia.
Tang, lelaki nya madah ngagai indu nya, iya ditan ba KLIA lalu minta indu nya nepu duit ngagai akaun iya dikena ngelepaska iya ari kena tan.
Laban kelalu arap ngagai jaku lelaki nya, indu tu rugi urung RM40,000 pengudah dua kali nepu duit ngagai akaun lelaki nya.
Siti agi sebana ke suah diterima iya nya chara nipu madah deka nyekat akaun bank.
Orang ke ditipu tu mega siku bini orang ke nadai gawa peranak menua tu nerima kangau ti madahka diri sebengkah ejensi meri kad kredit lalu madah iya ngembuan utang enda dibayar manggai RM3,900.
Udah nya piak nya madah, ketegal utang nya, akaun ke dipenggi indu nya deka disekat Bank Negara Malaysia (BNM), dikena nyeliah pekara nya nyadi, indu nya dipinta betelefon nuju siti lumur ke diberi.
Indu nya laban irau ati terus betelefon ngagai lumur ke diberi orang nya lalu iya dipinta mindahka duit ari akaun iya ngagai akaun bukai.
Nadai berunding panjai, indu nya terus mansutka semua duit saham ke disimpan iya lalu mindahka ngagai akaun orang ke nadai dikelala nya.
Pengudah duit nya dipindah, iya baru nemu pengawa nya salah lalu betelefon ngagai piak bank ngambika meresa.
Bekaul ari penyadi nya, indu tu rugi manggai RM310,000. MIRI: Parti Sa’ati Rayat Sarawak (SUPP) Pampang Senadin ngelaluka kerejasama gempung ukai dikuasa perintah (NGO) mantu mantaika isu pengelantang komuniti ti begunaka bantu di Miri kelebih ari sitak Senadin.
Chairman iya ke mega Kaban Kunsil Nengeri ( ADUN) Senadin, Datuk Lee Kim Shin madah sukung NGO beguna endar mantu perintah bejalaika kereja rama enggau ngintu pengelantang.
“Pintu kami seruran ditukang ngagai NGO ti deka bekerejasama dalam pengawa kitai ngangkatka tikas idup komuniti ari sukut rama enggau pengelantang,” ku iya madah ngagai pengarang berita pengudah ngabas peranak di palan besai bebelika barang Morsjaya kemari.
Lee ke mega Menteri Muda Dagang Temuai, Seni enggau Main Asal madahka bisi seraban ari bansa Dayak ditu mantaika diri bisi ati bekerejasama enggau parti bejalaika aktiviti rama enggau pengelantang di Senadin.
“Raban nya madahka aku ke alai sida bejalaika pengawa ngintu pengelatang baka ngemanahka rumah peranak seranta di Tudan dalam minggu nyin tadi.
“Aku temegah ati enggau semangat sida lalu merambu ngagai sida numbuhka serakup pengelantang rama lalu rejista enggau ROS,” ku iya nerang.
Ku iya nambah, parti tau nyediaka kereban dikena ngemanahka rumah seraya NGO ulih mantu bejalaika pengawa ngemanah.
Tim Servis Komuniti SUPP Senadin diatu bekerejasama rat enggau Opis Pengerejista Bansa (JPN) ba pengawa nyediaka servis rejista mindah kin kitu di Senadin.
Aku enggai meda kes tu kelalu lama, polis patut lengkas bejalaika pengawa, sidi orang ke menggi akaun bejalaika sindiket nipu nya. Datuk Lee Kim Shin Menteri Muda Dagang Temuai, Seni enggau Main Asal