Urung 60,000 polis benung dilatih dikena napi PRU14

KUCHING: Urung 60,000 pemesai enggau kaban Polis Diraja Malaysia (PDRM) di serata menua diatu benung dilatih dikena nyikap diri napi pengawa bepilih besai ke-14 (PRU14).

Direktor Opis Pengelikun Dalam Menua enggau Pengelantang Orang Periman (KPDKA) Datuk Seri Zulkifli Abdullah madahka latih nya ditaga tembu ujung bulan baru dikena nyikap anggota betapi enggau pemar tauka penguji sekumbang PRU.

Nitihku iya, nengah latih nya dikearapka deka meri peneleba ngagai kaban polis sentang pengawa ti dikereja sekalika ba palan ngundi tauka maya ngereja pengawa bukai bekaul enggau pengawa bepilih.

“Kitai deka meda raban kitai udah nyikap diri maya perintah madahka haribulan PRU-14 diatur.

“Berindik ari nya, urung 60,000 iku anggota kitai di serata menua benung dilatih bejalaika pengawa baka ba palan ngundi, bilik operasyen enggau meri penerang bekaul enggau gaya utai ti dipelabaka nyadi maya pengawa bepilih,” ku iya.

Iya mansutka pekara nya ngagai raban pengarang berita rambau penemuai gawa ke Indu Opis Pasukan Gerakan Am (IPG) di Batu Kawa ditu, ensanus.

Kelimpah ari nya, Zulkifli mega madahka Unit Penagang Penyarut ( PORU) ke bisi di Sarawak dipelabaka chukup ngambi lalu bjalaika pengawa baka Unit Besai Volunteer (FRU) di Semanjung Malaysia, maya PRU-14 tu.

“Di Sarawak unit enggau isu bebida ari enggau di Semanjung Malaysia, ke alai gaya utai ke nyadi enda kelalu balat lalu tu siti ari kebuah kitai nadai FRU tang semina PORU di Sarawak,” ku iya.

Taja pia, Zulkifli madahka piak iya seruran berati enggau peminta guna FRU di nengeri tu.

“Naka diatu kitai ngasaika nadai peminta guna FRU di nengeri tu lalu nyema bisi guna mega, kitai ulih nganjung unit nya (FRU) ke udah bisi di Semenanjung Malaysia bejalaika pengawa ditu.

“Di Sarawak, PGA deka bejalaika pengawa FRU, bisi enam PORU ti bisi tanggungpengawa ti sama lebih agi nyaga pemaik enggau pengelantang mensia mayuh,” ku iya.

Sama bisi datai Sapit DIrektor KPDKA (PGA) DCP Dato’ Abdul Hamid Mohd Ali enggau Komander Briged Sarawak PGA SAC Dato’ Khaw Kok Chin.