Uggah tetarit ari enggau chara RH, KTS ngelakuka madu engkelulut
K U C H I N G : O p i s Menteri Betanam Betupi Moden, Tanah Adat Asal enggau Pemansang Kandang Menua tetarit ati enggau dua buah kompeni madu engkelulut ti udah nengah chara komersial ngelakuka madu engkelulut ngagai makit renggat dunya.
Menteri opis nya, Datuk Amar Douglas Uggah Embas ke mega Sapit Kepala Menteri madah, dua buah kompeni iya nya Rimbunan Hijau ( RH) enggau KTS.
“Kami dalam proses berandau enggau RH sereta KTS, laban kededua kompeni nya bisi lebih 5,000 sarang engkelulut ba kebun sida.
“Sida ulih ngemansut beberapa tan madu engkelulut dalam sesiti timpuh. Kami beratika kati ku chara ngerembaika makit ngagai menua luar nengah kerejasama enggau RH sereta KTS, ke endang udah bisi makit ba renggat entarabansa,” ku iya lebuh bejadi pampang Parti Pesaka Bumiputera Bersatu ( PBB) Murum di Uma Bawang, Sungai Asap, Belaga kena Hari Empat tu tadi.
Beratika madu engkelulut bisi “potensial besai”, Uggah madahka nupi indu engkelulut enda mar laban pengemeran enda meri makai indu utai nya tauka nyaga indu engkelulut.
Ku iya, penyadung madu engkelulut di Semenanjung Malaysia mega ngulihka bekal madu nya ari pedagang di Sarawak ketegal rega ke murah agi.
Nyebut sentang pampang PBB Murum, Uggah minta tetiap iku kaban ngenanka rikod manah ngambika mudah ngaduka bemacham program pemansang ila.
“Taruh profil tetiap iku kaban nyengkaum kereja sida, tikas pelajar enggau bansa program ke dipelaba sereta sekalika sida bisi ampit ngasaika pemansang ke diatu,” ku iya.
Ku iya baru, perintah Barisan Nasional ari baruh iring Kepala Menteri Datuk Patinggi Abang Johari Tun Openg enggau Menteri Besai Datuk Seri Najib Tun Razak udah ngelanchar sekeda program ke pengelantang komuniti.