Jalai jai ngenusah pengidup ninting hari peranak Genturung Pendiau Tuba
SIMUNJAN: Peranak Genturung Pendiau Tuba berambunka nyawa sereta irauka pengelikun diri maya betengahka jalai tanah bekau jalai kompeni kayu batang sepenyauh 35 kilometer ti lichin, kelebih agi maya musim pengujan.
Pengirau nya dikenatai Tuai Rumah (TR) Genturung Pendiau Tuba Ulu, Gura Empulu laban semina jalai nya ke nyadi penyambung kelimpah ari ke ditengah ninting hari bala apai indai ke beranjungka anak besekula.
Berindik ari penanggul nya, Tr. Guru enggau peranak rumah panjai nya ngarapka perintah ngemerat sereta ngenyampatka pengawa ngemanahka jalai tanah nya berengkah ari Pasar Pantu ngagai Genturung Pendiau Tuba.
“Jalai tanah bekau pengawa ngulihka kayu batang tau ngeruga nyawa tauka pengelikun laban jalai nya lichin kelebih agi maya musim pengujan, kelimpah ari ke enda ulih enda meraka sungai ke deras.
“Semina jalai tanah nya aja ke nyambung ngagai genturung pendiau kami ke ditengah maya nganjung anak ngagai Sekolah Menengah Kebangsaan (SMK) Simunjan tauka maya bisi tuju bukai.
“Nya kami amat ngarapka perintah ulih ngenyampatka pengawa ngemanahka jalai tanah nya ke pengelantang kami,” ku iya, apin lama.
Nandu baru, iya ngarapka perintah ulih berundingka penanggul sida serumah nya, kelebih agi peranak gentu- rung pendiau nya ke endang nyadi penyukung perintah Barisan Nasional (BN).
Nambahka nya seiku pengajar ti mega peranak Genturung Pendiau Tuba, Saba Silong madahka piak sekula betapi enggau pemar maya nengah jalai nya lebuh ke bisi pengawa rasmi ba Opis Pelajar Pelilih Menua (PPD) Simunjan.
Ku iya, ba iya kala nyadi lebuh diasuh ngulu kus ba PPD Simunjan ke alai iya nikal baru laban bisi tanah tusur lalu ngelamun jalai ketegal ujan bangat.
“Kala aku maya ke bisi pengawa ke diasuh sekula tauka pekara bekaul enggau sekula, kekadang aku enda ulih nyeliahka diri ari jalai ke ngeruga pengelikun nya ketegal deka bejalaika tanggungpengawa,” ku Saba.
Sapit Tr Genturung Pendiau Tuba Ulu, Muntigerai Enteri mega madahka peranak ngelama tu lama udah liat ati agi nganti pemansang ke nadai udah tentu diasaika.
Ku iya, sebedau tu nitihka penerang ari Opis Kereja Raya ( JKR) Bagi Menua Samarahan, jalai nya deka dikemanahka nengah pengawa penemuai Kaban Kunsil Nengeri Balai Ringin, Datuk Snowdan Lawan ngena belanja urung RM200,000.
“Tang, ungkup belanja nya bedau chukup dikena melakin jalai tanah nya,” ku iya.