Abg Johari: Belanja ungkup projek infrastruktur besai telekomunikasyen deka dipejurai maya DUN Nov tu

KUCHING: Perintah Nengeri dipelabaka deka mantai sereta bejuraika belanja sepenyampau RM500 juta ungkup projek infrastruktur besai telekomunikasyen maya Aum Kunsil Nengeri (DUN) bulan November ke deka datai tu.

Kepala Menteri, Datuk Patinggi Abang Johari Tun Openg madah, nya dikena nyapai juluk nengeri ke deka nyendiaka servis internet ke pemadu engkeman enggau laju ngagai mensia mayuh.

Nitih ku iya ke bendar ungkup belanja dikena bejalaika projek pemansang infrastruktur nya kepenyampau RM1 bilion tang dibagi ngagai dua renggat.

“RM500 juta nya dalam bajet 2018 ila, tang nganti dulu penerang silik ke deka dipejuraika bulan November tu, nya ungkup infrastruktur besai (telekomunikasyen).

“Aku bisi ngungkupka sepenyampau RM1 bilion, kitai enda ulih bejalaika dalam timpuh setaun nya alai ba renggat keterubah RM500 juta lalu laluh RM500 juta agi nya ba renggat kedua,” ku iya lebuh dikerandau raban pengarang berita.

Dulu ari nya Abang Johari ngulu Forum Belia Tegas sereta bejuraika topik “Transforming Sarawak Through Digital Economy”, ti diatur Tabung Ekonomi Gagasan Anak Bumiputera Sarawak (TEGAS) begulai enggau perintah nengeri sereta MAGIC ba BCCK ditu, lemai kemari.

Kelimpah ari nya lebuh ti ngenang pasal “Big Data” Abang Johari madahka nya deka nyadi hub data ngagai mensia mayuh.

Ngenang pasal nya iya madahka naka ke diatu nya semina ungkup perintah Sarawak aja.

“Diatu semina ungkup data Sarawak aja.

“Tang jemah ila engka, enti perintah besai deka nempa kerejasama, enti sida deka meri penerang ngagai Big Data.

“Big Data tu deka nyadi sigi hub tu ngempuruka semua data ke alai mensia mayuh ulih bulih semua penerang ari nya,” ku iya.

Sama bisi datai ba pengerami nya kemari Menteri Muda Perambu Mengeri, Pengatur Tanah enggau Rampa Menua ti mega Chairman TEGAS Datu Len Talif Salleh, Menteri Dagang Temuai, Seni, Main Asal, Nembiak enggau Lumba enggau Main Datuk Abdul Karim Rahman Hamzah enggau ke bukai.