HSN agenda nasional dikena nempa atlit tikas antarabansa
BINTULU: Hari Lumba Nasional (HSN) nyadi agenda nasional deka seruran diatur lalu diatur ninting taun dikena nempa atlit ti deka nampung pengawa ngarika menua ba lumba tikas antarabansa dudi hari.
Menteri Dagang Temuai, Main Asal, Nembiak enggau Lumba, Datuk Abdul Karim Rahman Hamzah, madah menua tu deka nempa mayuh agi atlit bisi status olimpik baka Pandelela Riong enggau Datuk Lee Chong Wei sereta bebendr gawa nentuka mayuh agi sida ti deka nampung atlit paralimpik baka Mohd Ziyad Zokeflie nggau Abd Latif Romly.
“Dipadu bulih gelar champion kesemua Lumba Sea ke-29 Kuala Lumpur 2017 enggau penyapai 145 midul emas lalu tu ngasuh semua peranak Malaysia temegah ati,” ku iya.
Iya mansutka jaku nya dalam teks jaku dibacha Menteri Muda Nembiak enggau Lumba, Datuk Snowdan Lawan rambau bejadika HSN Renggat Nengeri ba Panggau Padang Dewan Suarah, ditu kemari.
Ku iya, menua tu udah mujur nempa atlit midul emas pemadu biak nengah Adam Yoong Hanifah beumur 9 taun ba pekit Water Ski enggau lelaki pemadu laju di Asia Tenggara, Khairul Hafiz Jantan enggau rikot masa 10.34 sikin ba pekit belanda 100 meter lelaki.
“Meri pengaga ati ngagai atlit peranak Sarawak ti mujur bulih emas Lumba Sea apin lama ke udah,” ku iya.
Ku iya, Malaysia nyelinting penuduk kedua kesemua Lumba Para Asean KL2017 enggau teulihka 94 emas, 80 pirak enggau 54 engkeraju mega ngemegahka atlit nyelai pendiau menua tu lalu tu udah mujur nyadi pelasar ngagai 111 iku atlit biak bepekit sereta bulih 30 midul emas.
“Penyulut dipajai semua atlit Malaysia rambau pekit lumba disereta enda deka diulih nyema nadai saup ari mayuh piak.
“Siti ari pengawa dikena nyapai penyulut iya nya ngemeranka lumba dalam pengidup besehari sehari ari renggat pun menua,” ku iya nambah.
Dulu agi ari nya, Snowdan lebuhka dirandau media madah, HSN nyadi program pemadu manah negutka tanggam kaul, meri pengeregas enggau pengerai kelimpah ulih dikena nempa penau bala anak dalam lumba sereta sida ngaul diri dalam lumba renggat nasional enggau antarabansa.
“Sehari tu kitai betuah denggau penatai Pendelela Rinong Pamg (Akuatik Terjun) enggau Loh Jack Chang (Wushu) bela ngerichahka pekit lumba begulai enggau peranak Bintulu.
“Tu nyadi kenang pemadu manang ngagai peranak Bintulu lalu ulih begulai enggau atlit menua serayaka betanya pasal pemujur sida ti ngasuh menua temegah,” ku iya.
Ku iya, tu nyenggala ngayanka lumba ulih nyadi pelasar ngempung rayat datai ari pupu bansa di menua tu.
Nya alai ku iya, pengawa ngintu HSN nyapai juluk atur renggat nengeri ba pekit belanda 5 kilometer (km) enggau 10 km enggau penyereta komuniti di menua tu.
“Sehari tu, mayuh peranak Bintulu datai ngerichahka HSN lalu tu ngayanka pemujur dijapai, terima kasih ngagai kaban komiti pengatur, piak Opis Residen Bagi Menua Bintulu enggau bala bukai ngemujurka HSN tu,” ku iya.
Program HSN tu mega digulu Kaban Kunsil Nengeri (ADUN) Samalaju Majang Renggi, ADUN Murum Kennedy Chukpai Ugon, Sapit Residen Bagi Menua Bintulu Hamdiah Bakir, Ketuai Unit Lumba Opis Menteri Dagang Temuai, Main Asal, Nembiak enggau Lumba Zul Usup, Sekretari Politik Kepala Menteri Victor Temenggung Angang, Pemesai Nembiak enggau Lumba Bagi Menua Bintulu Nik Muhammad Asraff Nik Mod Kamal sereta bala temuai ke bukai.