Perintah udah setuju melakin jalai 2.8 km ari Po-Ai ke Kpg Batu Besai

SRI AMAN: Berita manah ngagai enam buah rumah panjai ari Kampung Batu Besai, Sri Aman, ti lama udah nganti jalai dibelakin, pengudah perintah setuju deka ngemanahka jalai sepemanjai 2.8 kilometer ari Po-Ai, Melugu ngelawa genturung pendiau nya.

Sapit Menteri Dalam Menua, Datuk Masir Kujat madah, perintah nengah Opis Menteri Pemansang Menua Pesisir Enggau Kandang Menua (KKLW) apin lama ke udah, udah ngemendarka agih belanja penyampau RM500,000 dikena ngemanahka jalai nya ti deka dipejalai enda lama da agi.

Nitih ku iya, tinder bejalaika projek nya deka dibuka ujung taun tu tauka dalam pun taun baru.

“Ba renggat keterubah, perintah deka dulu agi bejalaika kereja ngemanahka jalai sepemanjai 2.8 kilometer lalu deka ditampung 4.4 kilometer, udah nya nampung baru 1.6 kilometer nangkan nya,” ku iya.

Masir ke mega Kaban Parlimen ( MP) Sri Aman mansutka jaku nya rambau bejaku ba Program Randau Sapit Menteri Dalam Menua Begulai Enggau Ketuai Opis Perintah Besai enggau Nengeri, Gempung Ukai Dikuasa Perintah ( NGO), bala Ketuai Raban Bansa di Menua nya bepalan di Balai Saint John, Chapel Melugu semak ditu, kemari.

Ku iya, projek ngemanahka jalai tu deka ngemai pengelantang ngagai enam buah rumah panjai di Kampung Batu Besai, Sri Aman ti ngaul Rumah Mengga, Rumah Kedeni, Rumah Jelang, Rumah Loius, Rumah Sedok enggau Rumah Badak.

“Ukai semina nya aja, iya mega ngemai pengelantang sereta meri pemaik ngagai sebuah rumah panjai di kandang menua Panggau iya nya Rumah Connie.

“Nyadi pengari rayat di sitak Parlimen Sri Aman, aku mega berasai lantang pengudah dipadah perintah udah ngemendarka agih belanja dikena ngemanahka jalai tu ti deka ngemai pemansang baru di menua Batu Besai ila,” ku iya.

“Rayat udah lama nganti lalu tu nyadi perais pemadu berega ari perintah ngagai peranak ditu,” ku iya.

Berebak enggau nya, Masir mega ngenang pemanah pengawa enggau terima kasih ngagai peranak di menua nya laban seruran liat ati nganti tetiap projek ti dipejalaika perintah.

Sama bisi datai Kaban Kunsil Nengeri ( ADUN) Bukit Begunan, Datuk Mong Dagang, Residen Bagi Menua Sri Aman, Indit Banggai, Pemesai Pelilih Sri Aman, Ismawie Salleh, Direktor Opis Pengerejista Bansa ( JPN) Sarawak, Jasni Jabli, Chairman JKKK Skim Melugu, Tuai Rumah Robin sereta bala bukai.

Beserimbai enggau program nya, Masir bisi ngemendarka agih belanja ungkup taun 2018 penyampau RM100,000 ngagai Komiti Balai seraya RM10,000 da agi dikena ngauk enggau ngaga pagar balai.

Mong mega bisi ngemendarka belanja penyampau RM50,000 dikena nukar sambung tali karan di balai nya seraya RM40,000 da agi diagih ngagai Chapel Saint John ungkup pengawa ke sama.