NBOS entara sistem ke pemadu manah: Abg Johari
Dalam bejalaika sistem tu perintah begunaka kerejasama ari semua ejensi ngambika iya lebih sikar
SARIKEI: Perintah berundingka kerejasama antara mayuh bengkah ejensi nyadi jalai pemadu engkeman nentuka penyikar enggau pemanah pangka ba pejalai sistem (NBOS) ke diguna.
Pemanah pengawa besemekih antara ejensi perintah mega diperansang, taja pia, iya deka meruan agi nyema sida ulih gawa begulai laban sida ulih ngadang pemanah enggau pemutus ti pemadu manah, pia ku Kepala Menteri Datuk Patinggi Abang Johari Tun Openg.
Tu pun penemu di baruh formula Strategi Tasik Biru Nasional (NBOS) dipejalaika perintah, ku iya nerang dalam jaku dipansutka iya beserimbai enggau pengawa ngelancharka program Beripai My Beautiful Neighbour (MyBN) NBOS renggat nengeri di palan berandau ditu, pagi kemari.
Teks jaku iya udah dibacha Sapit Kepala Menteri Datuk Amar Douglas Uggah Embas, ti ngarika iya bejadika pengawa ngelanchar program ti diatur Opis Menteri Kaunsil Kandang Menua enggau Pengawa Berumah.
Abang Johari madahka NBOS nyadi penemu ti chukup manah dipunka Menteri Besai Dato Sri Najib Tun Razak, ke alai mida sistem pejalai servis perintah kemaya hari tu enggau ke dulu suba.
“NBOS nyadi sistem ti dikena bejalaika servis perintah, ke alai iya nerima timbal kerejasama ari semua renggat nyengkaum opis menteri, opis, ejensi enggau mega mayuh seksyen,” ku iya. Sistem NBOS udah dipejalai ngena dua penemu krea- tif; kerejasama antara mayuh bengkah ejensi enggau opis, belanja ti meruan, birokrasyen tauka pengawa meresa pita merah enggau nentuka pangka ti tinggi ke alai semua bepanggai ba penyikar enggau pemanah servis ti dikenatai, ku Abang Johari nandu.
Iya pechayaka inisiatif beripai NBOS ti ngaul enam sitak di nengeri tu - Mas Gading, Saratok, Miri, Sibu, Baram enggau Sarikei deka nyapai juluk iya – ngadaka pemanah rampa menua, beresi, likun kelimpah ari komuniti ti diau bebaik, angkunka pemanah ulah sereta lantang.
Abang Johari mega nyemetak madah transformasyen Sarawak nuju ekonomi digital begunaka kerejasama enggau pengawa bekunsika penemu tauka penerang antara mayuh bengkah raban.
“Ekonomi digital enda ulih dipejalai nyema kitai enda gawa begulai. Kitai ulih meda terus lebuh aku nguluka raban pemansik ngagai Estonia di Europe dalam bulan nyin tadi.
Bisi pemekal servis ti patut bekereja di pelasar digital ti sama enggau raban ke bukai ngambika servis nya lanchar. Enti enda, ambika chunto, kita enda ulih mindahka duit ari bank ngagai bank, mayar bil kita tauka mayar pupu penatai pemisi nengah chara digital, sereta mega nengah aplikasyen ke dikembuan kita,” ku iya.
Kaban Kunsil Nengeri (ADUN) Repok, Dato Sri Huang Tiong Sii ngarapka program Beripai MyBN NBOS tu deka nerenakka asai diri ngempu pasar ngagai peranak di menua tu ke alai iya pechaya pekara nya begunan dikena ngubah Sarikei nyadi menua ti beresi, rampa ti manah sereta menua ti likun endur diau.
Iya ngena awak nya meri terima kasih ngagai Uggah ke mega Menteri Betanam Betupi Moden, Tanah Adat enggau Pemansang Kandang Menua ti udah ngaku Sarikei nyadi Bagi Menua ti beguna endar di nengeri tu, kelimpah nyadi Tibang Pemakai ngagai Sarawak.
Huang mantaika pengandal diri deka mayuh agi projek betanam betupi nyengkaum sambung jalai ngagai kebun enggau sistem parit ti deka dipejalai di Bagi Menua nya kelimpah ari pengawa nyediaka mayuh agi subsidi skim betanam betupi.
Entara bala pemesai ke bisi datai Menteri Kaunsil Kandang Menua enggau Pengawa Berumah Datuk Senator Professor Sim Kui Hian, ADUN Meluan Rolland Duat enggau Residen Sarikei, Mohd Junaidi Mohidin.
NBOS nyadi sistem ti dikena bejalaika servis perintah, ke alai iya bisi pengurang ari sukut kerejasama ari semua renggat nyengkaum opis menteri, opis, ejensi enggau mega mayuh seksyen. Datuk Patinggi Abang Johari Tun Openg Kepala Menteri Sarawak