SRDC udah besumpah nyamin diri deka beresi ari penyalah makai suap
SIBU: Opis Kaunsil Menua Pesisir ( SRDC) udah besumpah madah diri deka beresi ari penyalah makai suap dalam bejalaika tanggungpengawa opis kaunsil nya ngagai rayat.
Chairman SRDC Kaunsilor Sempurai Petrus Ngelai madah, tu deka negutka agi integriti piak sida meri servis ti ‘beresi’, sikar sereta ngemujurka pengawa ke dilempai ngagai sida.
“Kitai semampai bepelasarka jaku ‘transparency’ enggau ‘accountability’ ba semua bengkah tanggungpengawa ke dikereja ngagai rayat ba menua ke dipegai.
“Semua tu beguna dikena bejalaika servis piak kitai ti nyadi piak ketiga ba rintai pegai perintah iya nya Perintah Besai, Perintah Nengeri enggau Perintah Kandang Menua lalu nyadi rintai keterubah antara rayat enggau perintah nengah pengawa meri servis dalam kandang menua,” pia ku iya madah.
Iya mantaika jaku tu maya SRDC ngatur Pengawa Nyain Sumpah Beresi Ari Penyalah Makai Suap ti diatur beserimbai enggau Licha Integriti ba sebengkah hotel ditu, kemari.
Pengawa tu dikemataka Pemantu Commissioner Opis Penagang Penyalah Makai Suap Malaysia (SPRM) Sibu Jutim Nyagam sereta bela digulu Sapit Chairman SRDC Kaunsilor Robert Lau enggau sekretari SRDC Justani Joni
Sempurai madah, nyadi ketuai ba sesebengkah organisasi kebendar iya ukai semina ngembuan integriti ti tinggi tang meseti mandangka chunto enggau integriti ngagai bala ke ari baruh.
“Seiti ari batang pekara dikena nempa sistem integriti iya nya integriti ti enda ulih dipejal tauka semina diteritka nengah undang-undang aja.
“Dikena negutka agi integ- riti ba kitai, piak ke diatas patut landik ngelangkar macham bengkah program ngambika nyadi ‘second nature’ lalu ‘educative’, ‘preventative’ ti meseti seririh enggau ‘punitive’,” ku iya madah baru.
Sempurai mega madahka diri berasai temegah ati laban naka ke diatu piak sida mujur mandangka diri alus tauka ‘transparent’ bejalaika pengawa perintah menua.
Iya mega ngarapka pengawa ke diatur sehari nya dideka nyadika lalau ngagai semua sida ba kaunsil nya nitihka atur perintah sereta semampai ingatka penyalah ba Akta SPRM.