Kuching FA deka nempa tim ti lebih kering napi pekit 2018

KUCHING: Tim Kuching FA deka berengkah ngiga pemain baru kena bulan November tu ila dikena nyikap diri napi kimpin main bol taun 2018.

Menijar tim tu, Fazzrudin Abdul Rahman ( gambar) madah Kuching FA patut bemain regas agi taun baru awakka ulih besemekih dalam dua bengkah pekit besai iya nya, Trofi FA 2018 enggau Trofi FAM 2018.

Berindik ari nya, Fazzrudin ke mega Kaban Kunsil Nengeri (ADUN) Tupong madah deka ngena pekit Trofi Sarawak enggau Trofi Nembiak nyadi pelasar endur ngiga pemain baru ke bepenau lalu dipasuk dalam tim tu ila.

“Kitai deka nempa tim ke lebih kering besemekih dalam Trofi FAM taun baru. Kelimpah nya, kitai mega patut nyikap diri napi Trofi FA laban Kuching FA udah dikenuku ulih nyereta pekit tu.

“Berebak enggau nya, Kuching FA mega deka nyain sempekat pemereti ati (MoU) enggau Suwon FC sereta Yayasan Park Ji Sung dikena ngangkatka agi kualiti bala pemain kitai,” ku iya kemari.

Fazzrudin madah iya berasai tepantup ati meda pengulih tim tu rambau pekit Trofi FAM 2017 taja semina teulihka pemujur naka renggat suku final.

Taja pia, iya ngaku agi mayuh pengurang ke patut dikemanah ba tim tu ngambika sida ulih ngerebut gelar champion ba taun baru.

“Ari semua perati aku berasai tepantup ati tang kami deka ngemanahka pengurang ari sukut peneleba nyadi tim ke ulih besemekih ba renggat tinggi,” ku iya.

“Perambu kami iya nya deka nyengulaika pemai biak enggau pemain ke mayuh peneleba.”

Kuching FA tesungkur ba pekit Trofi FAM pengudah alah 2-1 ari kira agregat ngelaban UKM FC ba renggau suku final.