Tetiap iku kaban PRS patut ngembuan kaul ti manah enggau pangan diri
SRI AMAN: Tetiap kaban Parti Rakyat Sarawak (PRS) sereta mega parti komponen perintah Barisan Nasional (BN) ke bukai patut seruran ransing sereta ngadaka kaul ti manah enggau pangan diri dikena nentuka parti nya seruran tegut.
Kaban Kunsil Nengeri ( ADUN) Bukit Begunan Datuk Mong Dagang madahka tetiap kaban parti meseti negika parti lalu enda mudah ninga jaku asut sereta cherita selebubu ngapa ke ulih ngeruga penyerakup ti tau mambarka parti.
“Semua kaban parti PRS anang mudah ninga jaku asut piak bukai sereta mega pechaya ngagai cherita sele- bubu ngapa kelebih agi ke disadung ba media rama. “Kita mega enti ulih begulai manah enggau pangan diri lalu enda kepapas entara pangan diri, laban kitai nemu pekara ti manah ungkup kaban enggau ketuai parti iya nya kaul ti manah ke begulai enggau enda bechiping,” ku iya lebuh ti bejaku rambau Aum Besai Ninting Taun ( AGM) PRS ke digaga di sebuah hotel, ditu bedau lama.
Kelimpah ari nya, Mong mega bisi ngelalau semua kaban PRS ke bisi datai ngulu AGM nya ngambi ke terus meri sukung penuh ngagai Kaban Parlimen ( MP) Sri Aman Dato’ Masir Kujat ke deka bediri ngarika BN maya Pengawa Bepilih Besai ke- 14 ( PRU14) ti deka datai.
“Aku minta kita semua nurun ngundi rambau PRU14 ti deka datai lalu bela meri sukung penuh ngagai pengari kitai iya nya Dato’ Masir Kujat ngambika iya ulih menang enggau majoriti ti besai,” ku iya madah.