Wong: Perintah Sarawak deka ngemanah sekula ti udah lama
KUCHING: Perintah nengeri Sarawak udah bejuraika sadang deka ngena duit jali ke di injau ari perintah besai kena mayar ungkus ngemanah sereta nyeruri sekula ke udah lama, ku Menteri Wang Kedua, Dato Sri Wong Soon Koh madah ditu bedau lama.
Iya madah perambu nya bisi dibantai Kepala Menteri Datuk Patinggi Abang Johari Tun Openg, ke madahka sadang nya enda tau enda dipansik dulu laban bisi bekait enggau atur pekara wang.
“Kepala Menteri bisi madahka perintah nengeri deka ngemanahka agi sekula ke udah lama, udah repu, tang enti perintah besai enda ulih mayar kitai (perintah nengeri), baru kitai besilih,” ku Wong madah lebuh dikerandau pengarang berita pengudah enggau ngulu muka Aum Besai Pengawa Dagang enggau Pukuk Sarawak (SBIS) Ke-4 ditu, bedau lama.
Taja pia, Wong ti mega nyadi Menteri Dagang Entarabansa enggau E-Dagang ngarapka chara ngatur akaun nya enda dipajakka, laban ku iya, iya pechaya perintah besai deka meri ungkup ngemanah sereta nyeruri sekula ke udah lama nya.
Ba lansa bukai, dalam siti atur pengawa Kepala Menteri ngepunka atur pengawa ‘Lun Bawang Cultural Showcase Dinner’ di sebuah hotel ditu, ke udah digulu urung 3,000 lebih mensia mayuh, lalu iya bisi baum enggau Menteri Besai Datuk Seri Mohd Najib Tun Razak enggau Sapit Menteri Besai Dato Seri Ahmad Zahid Hamidi pasal pekara nya.
“Perintah nengeri minta sekula ke udah lama tauka luya tu diseruri tauka digaga baru,” ku iya.
Wong nandu, madahka perintah nengeri endang deka nyendiaka infrastruktur ke menyana ungkup sekula di Sarawak, alai perintah nengeri betati nyendiaka ungkup RM1 billion ari Bank Pemansang Sarawak (DBOS) kena nyeruri tauka ngaga sekula baru ke sekula ke udah luya tauka lama.
Bedau lama tu tadi, Menteri Pelajar, Sains enggau Pansik Teknologi, Dato Sri Michael Manyin anak Jawong madahka di Sarawak, ari urung 1,454 sekula primari enggau sekondari di Sarawak, 1,020 udah luya nyengkaum 415 ke dikategori balat endar udah luya.