Mensia mayuh dilalau nyereta ‘Unity Night Run’ kena 25 Nov

SARIKEI: Peminta nyereta ‘Unity Night Run’ diatur Opis Pelilih Sarikei enggau Uni Sport diatu benung dibuka, semanjai bulan Oktober tu.

Nitih ku penerang dikeluarka komiti pengatur, pelanda 5km ungkup kategori Lelaki enggau Indu deka dipenyadi kena lemai 25 November.

Pelanda deka berengkah lalu tembu di Palan Sivik ditu, tang raban pengatur bedau ngenukuka ni gaya jalai ti deka ditengah.

Sida ti bisi ati nyereta dipinta ngerejista diri di Opis Pelilih, Victory Furniture Shop, Thong Chong Hardware tauka di The Sports Shop.

Bayar rejista RM30 siku lalu tetiap pesereta deka diberi T-shirt ti meseti dirasuk sida malam pelanda nya.

Raban pengatur nyediaka perais mata duit penyampau RM300, RM200 enggau RM100 ungkup penuduk lumur satu, dua enggau tiga, kelimpah ari tujuh perais sagu ati ungkup kededua kategori.

Kelimpah ari nya, 200 iku sida ti dulu nembuka pelanda dalam tetiap kategori bela deka diberi midul enggau setipikit penyereta.

Raban pengatur mega ngelalau bala pesereta ngemai kereban dikena malam hari baka lampu pichit, lampu pala enggau vest reflektif dikena nyaga pengelikun diri enggau baju ujan laban pelanda tetap dipejalai taja hari ujan malam nya.

Penerang silik nyengkaum atur enggau penetap, sida tau betelefon nuju Shirley Siaw (084-651299), Lau Yeo Huat ( 014- 6817768), Chieng Li Wei (016-5895767), enggau Wong Khung Kong (0168096279).