Ubah runding sereta bekerejasama enggau perintah
Ngambika semua program transformasyen ti deka dipejalaika ba sitak nya mujur magang, ku Anyi
MIRI: Komuniti Orang Ulu di Baram enda tau enda ngubah runding sereta bekerejasama enggau perintah ba pekara ngemujurka semua program pemansang ba sitak nya.
Kaban Parlimen Baram Anyi Ngau madahka Orang Ulu enda ulih nyingkang ke mua enti enda nitihka batang arus.
“Kitai enda tau enda nitihka batang arus. Perintah ke diatu seruran nyukung kitai,” ku iya lebuh bejaku ba pengerami Ketuai Begulai enggau Rayat ba Genturung Pendiau Lio Mato di Ulu Baram kena Hari Enam minggu nyin tadi.
Ku Anyi, beguna amat tetiap iku komuniti kelebih agi di Baram bekerejasama enggau perintah dikena nentuka program transformasyen ba sitak nya mujur dipejalaika.
Nyadi Kaban Parlimen, iya meri terima kasih ngagai komuniti Penan ke tebal agi ari sitak iya enda ngenggaika program ke diatur perintah.
Sida sama enggau lalu ngasaika semua pemaik ari perintah.
“Aku berasai beruntung endar sehari tu, laban tebal agi peranak ari pelan pengentap baru bansa Penan ulih enggau kitai ditu sehari tu. Tu mandangka kitai bisi kaul ke tegap,” ku iya.
Ba pengerami nya, randau bisi diatur begulai enggau peranak ari 17 genturung pendiau lalu tebal agi peranak nya ngenataika pinta ngagai iya.
Tebal agi sia minta pemansang nyengkaum infra-
Kitai enda tau enda nitihka batang arus. Perintah ke diatu seruran nyukung kitai. Anyi Ngau Kaban Parlimen Baram
struktur baka jalai ke manah nuju genturung pendiau sida.
Bansa Penan mega minta Anyi nyendiaka perengka dikena berumah baka atap zing.
Nyaut nya, Anyi madahka iya enggau naka ulih mantu ngambika tetiap iku nya enda tinggal ari semua program pemansang.
Program nya diatur Komiti Pemansang enggau Penge- likun Genturung Pendiau (JKKK) Lio Mato.
Lebih 250 iku ari 17 buah genturung pendiau bansa Penan enggau Kenyah bisi ngulu pengerami nya.