Besaup enggau sekula nempa atlit betikas antarabansa: Subeng
KUCHING: Pengeregas enggau pengeran raban sekula deka ngelatih bala nembiak nyengkaum sekula di menua pesisir dalam lumba enggau main, ulih mantu menua sereta nengeri nempa mayuh agi atlit betikas antarabansa enggau dunya.
Berindik ari pekara nya Subeng Mula, seiku orang ti ngelakuka diri deka nyadi chalun ba Parlimen Saratok ari Parti Demokratik Progresif (PDP) meransang sekula bantu apai indai nengah Gerempung Apai Indai enggau Pengajar (PIBG) besaup nempa atlit betikas tinggi.
Iya mega arap bendar sekula menua pesisir baka SK. Nanga Drau, Saratok ulih nempa mayuh atlit ke ulih ngangkatka nama nengeri enggau Malaysia kelimpah ari nama sekula.
“Penyereta sesiku nembiak dalam bidang lumba enggau main ukai semina ba renggat sekula aja, laban sekula di menua kitai udah nempa mayuh atlit ti betikas menua enggau dunya.
“Aku arap bendar jemah ila, SK Nanga Drau ulih nempa mayuh atlit ke nyulut dalam lumba enggau main renggat tinggi baka Sukma, Sukan SEA, Olimpik enggau ke bukai.
“Nya alai aku ngarapka sekula enggau apai indai sedia besaup nyadika SK Nanga Drau nyadi sebuah sekula ti mekalka menua kitai ti nyulut ngagai menua kitai ba mayuh renggat,” ku iya lebuh bejaku bejadika Slumba Darat Ninting Taun PIBG SK Nanga Drau, Saratok, apin lama.
Bejaku baru, iya madahka nya senipak bendar enggau juluk perintah Malaysia ti udah ngaku Hari Lumba enggau Main Menua dipasuk dalam kalender Malaysia.
Kelimpah ari nya, iya madahka lumba enggau main ukai semina deka nempa atlit betikas antarabansa tang mega ulih nempa pengeregas runding, bisi disiplin enggau penegap diri.
Objektif lumba enggau main tu ukai semina deka menang bepekit belumba tang dikena ngenukuka pesereta ngembuan tikas pengeregas tinggi sereta ulih nyeliahka diri ari mayuh penyakit seraya ti ulih nempa orang seseiku ti berani sereta ulih besemekih.
Ku iya, pengerai fizikal ti optimum nyadi kunchi ngagai pengawa nempa runding ti lebih regas, lalu ari nya bala nembiak ulih berunding enggau tajam sereta ulih fokus maya proses belajar.
“Mayuh orang kemaya hari tu enda beratka lumba enggau main dalam pengidup. Lumba enggau main diganti ngena aktiviti bukai baka bemain video, meda internet enggau ke bukai.
“Lumba enggau main ke diatur PIBG tu udah tentu ulih meransang bala nembiak enggau pengajar ngemeran enggau ngemeratka lumba enggau main ke lalu ulih nyeliah tauka ngurangka ari ngereja aktiviti ke nadai meri penguntung,” ku iya.
Sama bisi datai ba pengerami lumba enggau main nya apin lama, YDP PIBG SK Nanga Drau, Bayai Bungin enggau ke bukai.