NGO di Sibu dipinta chakah ngatur program pemansang nembiak

SIBU: Gerempung Ukai Dikuasa Perintah ( NGO) dipinta chakah agi ngatur program bekaul enggau pemansang raban nembiak ba sitak tu.

Coordinator Barisan Nasional (BN) Parlimen Sibu Robert Lau Hui Yew ma- dah, pengawa baka nya nyadika pelasar ngagai juluk ati ti deka nempa nembiak ti produktif.

“Nya alai, NGO bela megai tanggungpengawa ba pekara bekaul enggau pemansang raban nembiak.

“Kitai ngarapka NGO ditu chakah ngaduka program enggau pengawa bekaul enggau nembiak lebih agi baka ngatur pemansang lumba enggau main ba bala nembiak,” pia ku iya madah.

Iya mantaika jaku tu maya bejadi Pekit Futsal Tebuka Hari Main enggau Lumba Menua ba Stadium Futsal Bukit Lima ditu, empai lama tu tadi.

Pekit nya diatur Kelab Sukan Rekreasi Taman Rejang (KSRTR).

Sama bela datai maya tu iya nya Presiden KSRTR Halel Ibrahim, Sekretari enggau Tukang Wang gerempung sida Hairul Ibrahim enggau Zamri Kiprawi.

Berebak enggau pengerami nya, Lau muji pengawa ke diatur KSRTR laban mujur ngangauka Gerempung Futsal Australia bela datai bemain maya nya.

“Tu tau bendar meri awak sereta peneleba ngagai nembiak kitai ditu senentang teknik bemain betikas antarabansa,” ku iya madah baru.

Bepun ari sukung ngagai pengawa nya, Lau maya tu bisi nyuaka pemeri ari iya ngagai gerempung nya.

“Ngarapka pemeri tu nyungkakka agi pengeransing KSRTR nandu pengawa ngatur program baka tu lalu ngarapka mujur nempa menua ti regas ba pengawa lumba enggau main,” pia ku iya madah.