Baru Bian patut berati enggau silik penerang ari presiden PBDSB

KUCHING: Ulah Ketuai PKR Sarawak ti nyalahka PBDS Baru (PBDSB) bekaul isu Hudud berupai amat ngembuan politik ti mejal. Ba penerang berita iya, Baru Bian nuduh presiden PBDS Baru mansut ka penerang ti nyarutka penemu rakyat ti madah PKR nyukung PAS bekaul isu undang-undang Hudud.

“Jaku ti dipansutka aku bepelasarka berita ti amat ti dipansut ka New Strait Times kena ka 10 Februari 2017. Aku enda mansut ka berita selebubu lalu pekara tu ditemu mensia mayuh,” pia ku Cobbold.

Nitihka penerang berita nya, penemu Datuk Seri Wan Azizah bendar amat disakal bala DAP kelebih agi ba Datuk Zaid Ibrahim.

“Aku nadai penanggul enggau YB Baru. Kami duai endang lama udah begulai ari jeman PBDS suba lalu iya kala mangku pengawa nyadi Mandal Presiden. Kelimpah sama kala bediri atas tikit MDC/SNAP taun 2006 suba”, ku Cobbold.

“Tang serak tu aku tekenyit laban iya bejaku nganu aku sereta ngumbai aku enda patut nyadi ketuai.

“Baru siku ari luyar tebilang lalu patut nemu siku orang enda tau dituduh salah enti empai diletakka salah. Nya alai, ba dunya politik pan sebaka, iya enda tau nganu aku, tang manah agi betanya ngagai presiden PKR ngenukuka pekara tu,” pia ku Cobbold.

Cobbold mega madah, PKR suah nuduh PBDS Baru tu kaban BN sereta orang keterubah mantah kenyau PBDS diidupka baru ngena nama PBDS Baru.

Cobbold mega madah, PBDS Baru enggau besai ati muka pintu ngagai YB Baru nyeretai sida.

“Aku meda pedis amat YB Baru deka bejakuka Dayak dalam PKR. Penemu iya manah tang enda meri empas ka besai laban iya bejaku ka PKR. Nya alai, iya patut berundingka pekara tu enggau dalam agi,” ku Cobbold.