Mensia mayuh patut liat ati nganti perintah mutarka isu tanah NCR
JULAU: Mensia mayuh dipinta liat ati nganti perintah ti betuaika Sapit Kepala Menteri Datuk Amar Douglas Uggah mutarka isu bekaul enggau tanah Adat Bumiputera (NCR) ba nengeri tu.
Kaban Parlimen Julau Datuk Joseph Salang Gandum madah, Uggah dilempaika pengawa ngiga chara baka ni meri definisi ke pemadu engkeman ba Pemakai Menua enggau Pulau Galau (PMPG).
“Ngarapka kitai bela meri awak ngagai iya sereta komiti ke dipilih iya bejalaika pansik ba isu PMPG lalu mujur mai pemutus ke manah nangkan tu ti ulih mai pengelantang ngagai semua,” pia ku iya madah.
Iya mantaika jaku tu maya bejadi Kus Nanam Sawit ba Rumah Inting di Nanga Lasi, Julau, kemari.
Kus tu diatur Gerempung Nanam Sawit Dayak (DOPPA) enggau Opis Minyak Sawit Malaysia (MPOB).
Nambahka jaku iya, Salang maya tu mega madahka perintah nengeri mengkang chakah mutarka isu NCR taja tanah udah sukat kelinggi.
Iya madah, naka ke diatu tanah ke udah disukat nyadigazet komunal ti mega tanah perintah nengeri ba Seksyen 6 Kanun Tanah Negeri.
“Ketegal tu bansa Dayak ke beempu tanah berasai irau sereta ringat amat.
“Agi mayuh saru sentang pekara tu,” ku iya madah baru.
Ba pekara bekaul, iya madahka diri berasaika lantang ati laban MPOB dikemendar- ka nanam sawit ba tanah NCR ke udah disukat kelingi.
Ku iya, iya ngarapka MPOB enda natak orang ke beempu tanah nanam sawit ba tanah sida empu kelimpah beberika bantu baka sum tauka bantu bukai ngagai orang betanam sawit.
“Aku bisi dipadah senentang MPOB diberi tanggungpengawa ngiga kontraktor dikena ngelasi tanah sereta ngemataka pengawa nanam sebedau sawit nya diberi ngagai orang ke endang beempu tanah.
“Ba aku, manah agi orang ke beempu tanah bela enda tinggal ngaduka tanah sida kelimpah MPOB meri bantu ke patut ngagai sida,” pia ku iya madah.
Salang madah, bisi kontriktor ke dipilih ngelasi tanah semina ngira penguntung diri empu aja.
“Tang enti orang ke beempu tanah bela enggau ngaduka tanah sida, projek nya endang enda timpang sereta mujur,” ku iya madah baru.
Iya mega madah, nyema suntuk kontriktor laban peminta nanam sawit kelalu mayuh, iya besedia mantaika pekara nya ba Parlimen.
Sama bela datai maya pengerami tu iya nya Presiden DOPPA Dr Richard Mani enggau Mandal Presiden DOPPA Rita Insol sereta bala pemesai ari MPOB ke bukai.