75 iku pengajar interim diketu ketegal abis timpuh kontrak
KUCHING: Menteri Pelajar, Sains, enggau Pansik Teknologi, Dato Sri Michael Manyin anak Jawong madahka 75 iku pengajar interim ti diketuka servis berengkah ari 31 Oktober tu tadi ketegal abis timpuh kontrak.
Ku iya, sida tu tau ngambi peresa psychometric baru ba bulan November tu lalu minta nyadi pengajar tetap.
Iya madah munyi tu lebuh dikerandau pengudah bejadi National Conference on Thinking Culture ( NCTC 2017) ti diatur ba Institut Pematih Pengajar Kampus Tun Abdul Razak ( IPGKTAR) ditu kemari, ke berengkah ari kemari nyentuk 3 November tu ila.
Ku iya baru, raban tu mega diberi peluang ketiga ngambi peresa ‘Psychometric’ baru,iya nya peresa nguji penegap runding, enti chalun pengajar nya engkeman nyadi pengajar tauka enda.
“Peresa ‘Psychometric tu ukai diperesa orang sengapa, tang pakar Psikologi enggau komputer,” ku iya.
Polisi ngambi pengajar interim tu suba keterubah endar dikemendar Kepala Menteri suba, iya nya niang Datuk Patinggi Tan Sri Adenan Satem, ti minta 90 peratus pengajar di nengeri tu enda tau enda ari nengeri tu empu (Sarawak), lalu lebih 10 peratus nya tau diambi ari Semenanjung Malaysia tauka ratio 90:10.
Taja pia, penyampau pengajar ke udah nembuka latih nyadi pengajar di nengeri tu, enda chukup ti ngujungka peminta mega dikerembaika ngagai raban graduet bukai (ke ukai ngambi kus ngajar) ke bisi ati deka ngajar.
Raban nya tau diambi ngajar tang sida iya enda tau enda dilatih dulu nyadi pengajar nyengkaum diasuh ngambi peresa ‘Psychometric’.
Lebuh ditanya sekalika polisi 90:10 nya mujur baka ti dikedeka tauka enda, ku iya:
“Opis Menteri Pelajar bisi atur kediri chara milih pengajar , laban kitai begunaka pengajar ke bekualiti, ukai semua naka kualiti aja tang ngembuan pengerindu ba pengawa nya.
“Pelaba nengah peresa Psychometric nya, penegap raban tu sekalika ulih nyadi pengajar tauka enda ditemu laban peresa tu diperesa komputer.
“Kitai enda ulih nyemetak ngeletakka penyampau ratio 90:10, laban kitai patut nemu gaya pengajar ti dikedeka kitai. Sekeda ari pengajar datai ari Semenanjung Malaysia (ukai aku nyukung sida), sekeda nya sigi landik ngajar,” ku iya.
“Kitai patut beratika pengajar ke dilatih nya ke alai sida nya enda tau enda bekualiti. Ambika chunto baka di Singapore, perintah menua nyaendang ngemeratka profesyen nyadi pengajar, ke alai sida semina ngambi 30 peratus ari kohort ke tau nyadi pengajar, di Korea selatan (5%), Finland (10% ke pemadu pandai), nyengkaum Jepun enggau Australia sama 30 peratus,” ku iya.
Sama bisi ngulu atur pengawa nya kemari, Direktor IPGKTAR, Hamsiah Abdullah Masni.