Sampal datai ngulu gempuru likun tanah NCR SADIA: Capt Collin
KUCHING: Gerempung Dayak Sarawak (PEDAS) nesau semua kaban gerempung nya sampal enggau ngulu gempuru likun tanah NCR kena 13 November, kelai sukung ngagai gempuru nya.
Presiden PEDAS, Mej (B) Capt Collin Imran madahka nya mega sebengkah ari batang pekara ti ditegika gerempung ngetanka hak bansa asal kelebih agi hak ba tanah ke endang tanah pesaka.
Iya madahka enti undangundang asal nya bechiping, undang- undang nya patut diubah ngambika enda bechiping.
“Aku nangkan sereta minta semua kaban gerempung tu kelimpah ari orang seseiku sereta gerempung ukai dikuasa perintah (NGO) ti ngetanka hak bansa asal, datai nyukung gempuru tu. Tang anang enda nitihka atur ngambika gempuru tu bejalai enggau lanchar.
“Enti undang-undang asal bechiping, dia undang-undang nya patut diubah, tu beguna dikena nyamin hak raban bansa ke dichiping sereta nyaga pengelantang enggau pemaik ngambika mungkur semua.
“PEDAS bepenemu amat patut perintah nengeri chakah sereta bebendar agi mutarka penanggul nya lalu chara dikena mutarka penanggul nya patut ulih diguna dalam timpu panjai,” ku iya seraya madahka isu nya ukai semina nuntung Dayak tang nyengkaum bansa bukai baka Melayu, Kirek enggau Kadayan.
SADIA deka ngatur gempru likun tanah NCR kena 13 November tu nyerumba baum Kunsil Nengeri (DUN) dikena minta perintah ngaga ubah Kanun Tanah Negeri enggau lengkas kelimpah ari bekaul enggau Pemakai Menua sereta Pulau Galau.
Sekretari Besai SADIA Nicholas Mujah Ason melabaka lebih 500 iku orang datai ti deka diatur ba tiga endur nyengkaum ba Tebing Sungai Sarawak ditu.
Iya ngarapka penanggul bekaul enggau tanah ke udah lama nyadi ulih dipejalaika enggau lengkas, laban mayuh penanggul sereta penyarut ke nyadi ketegal pekara nya.
“Tanah kami pengidup kami,” ku iya. KUCHING: Menteri Muda Perambu Mengeri, Mutarka Tanah enggau Rampa Menua Datu Len Talif Salleh madah kaul komunikesyen sereta bungkur digital di nengeri tu tu deka dikemesaika agi.
Kitai patut beambi ulih ba pemanah bungkur telekomunikesyen sereta ngemansangka chara mutarka rampa menua kitai enggau manah agi, ku iya.
Ku iya baru, lebuh perintah beratika e-ekonomi, e-dagang tauka e-kerejadagang, kitai pan ulih ngemansangka e-rampamenua. Aku ngarapka dudi ila kitai bisi chara ke engkeman agi dikena ngemataka data bekaul enggau kualiti angin sereta ai enggau pengamah, ke ulih dipeda nengah ‘remote sensing’.
Nya nyengkaum matau utai ke dibuai nengah chara digital. Kita ulih bechuntoka menua bukai ke udah ngaga sistem tu nyadi digital baka ngintu kampung, pemansut ai enggau marin sereta ngintu kampung sebelah tebing pantai enggau ke bukai, ku iya.
“Lebuh semua utai tu ulih digaga, semua peneka kitai mega ulih nyadi nyata,”ku Len Talif.
Iya madah munyi nya lebuh bejadi forum ‘Environmental Conservation for Sustainability Seminar 2017’ ti diatur Institut Kimia Malaysia (IKM) Sarawak nengah bekerejasama enggau Kaunsil Rampa Menua (NREB) di sebuah hotel ditu,ensanus.
Berebak enggau nya, Len Talif mega madahka NREB bisi numbuhka program matau kualiti ai, alai opis tu ngemataka 62 batang sungai, 3 letung sereta 4 buah tekad ai.
Semua tu dipejalai ngambika ulih ngemataka pemeresi sungai sereta letung nya.
Kelimpah ari nya perintah nengeri mega deka nyaga pemanah kualiti angin ke nyadi berindik ari pengawa betunu ti tau mai penusah sebun asap,” ku iya seraya madahka nya dikemata nengah Stesyen Nyaga Kualiti Angin disukat nengah Indeks Pengamah Angin (API).
Ku Iya baru, Teknologi ke pemadu moden dikena ngemata kandang endur ke angus, iya nya ngena ‘drone’ ngambika raban ke pengerara api ulih dianjung ngerara ngagai endur nya,” ku iya.
Sama bisi enggau ngulu atur pengawa nya, Kontrolar NREB Peter Sawal enggau chairman IKM Pampang Sarawak, Dr Alvin Chai Lian Kuet.