Beberapa bengkah NGO Dayak ngatur penemuai ngagai DUN S’wak kena 13 Nov
SIBU: Beberapa bengkah Gerempung Ukai Dikuasa Perintah (NGO) Dayak deka ngatur penemuai bebala mayuh ngagai Kunsil Nengeri (DUN) Sarawak kena 13 November ti deka datai.
Pengawa tu dipadah deka betuaika Gerempung Dayak Iban Sarawak (SADIA).
Kelimpah ari nya beberapa iku aktivis Dayak bela datai ngulu pengawa nya ila baka Nicholas Bawin enggau Nicholas Mujah.
Sekeda ari tuju pengawa tu diatur laban deka mandangka penyerakup bansa Dayak ngansak perintah nengeri ngubah Kanun Tanah Sarawak enggau lengkas.
Tu mega bepun ari deka meda orang ke beempu tanah adat Bumiputera (NCR) enda dichiping.
“Udah maya iya alai bansa Dayak begempung enggau pangan diri ngetanka hak NCR ngambika perintah enda mayuh kedalih agi ngubah Kanun Tanah Sarawak.
“Tu keterubah iya ba sejarah bansa Dayak datai bebala mayuh bejalai nengah jalai alun ngambika peminta dipendingka perintah,” pia ku Presiden Serakup Dayak Sarawak ( PEDAS) Capt Muhd Imran Collin ti bela datai maya pengawa nya ila.
Kelimpah ari PEDAS, gerempung Dayak kebukai bisi datai maya tu ila iya nya Dayak Think-Tank Group (DTTG).
Presiden sida, Wellie Henry Majang madah, sida enda belampung ati datai ngemujurka pengawa tu laban enda lantang ati meda mayuh kes bekaul enggau tanah NCR empai ulih diputar enggau manah ba kort.
Iya madah, kes tu nyengkaum baka kes TR Sandah enggau iya ke pemadu baru iya nya kes TR Nyutan kelimpah udah alah ba bepuluh iti agi kes ke sebaka ba taun tu aja.
“Nadai chara bukai mutarka isu Pulau Galau enggau Pemakai Menua (PGPM) enti Kanun Tanah Sarawak empai ulih diaduka baru.
“Lebih 50 taun ke udah kitai empai meda perintah ditu nguji deka ngubah atur tanah tu,” ku iya madah.