JKKK ulih ngadaka komuniti ke ransing ngulihka pemansang
Sida ngembuan tanggungpengawa ti besai lalu begunaka latih pengelandik dalam ngemansangka genturung pendiau
SRI AMAN: Komiti Pemansang enggau Pengelikun Genturung Pendiau ( JKKK) ti ditumbuh di tetiap genturung pendiau di nengeri tu nyadi siti ari strategi dikena nempa komuniti ti ulih gawa ngatika diri sereta ransing dalam pemansang.
Menteri Muda Pengelantang Komuniti Sarawak Datuk Francis Harden Hollis madah JKKK nyadi sebuah gempung ti ngatur pengawa, ngembuan tanggungpengawa besai endar ti gawa di renggat menua.
“Nya kebuah, bala ketuai JKKK endang patut diberi latih pengelandik ba semua pekara numbuh, ngatur, ngintu enggau ngemansangka JKKK ti bisi juluk, gawa ngatika diri, chakah sereta mansang.
“Ketuai enggau ngatur kereja gempung ti sikar nyadi pugu besai lalu patut bisi dikena nambahka pemansang di genturung pendiau, ngambika meruan agi. Kebuah pia laban bala ketuai komuniti, ketuai menua tu sereta JKKK nyadi ‘ Focal Point’ lebuhka berandau enggau baum enggau perintah laban projek enggau bantu ti disediaka perintah deka diberi, diterima enggau diatur sida,” ku iya.
Iya ke mega nyadi Kaban Kunsil Nengeri ( ADUN) Simanggang mansutka jaku tu lebuhka bejaku bejadika Pengerami Makai Lemai Ngintu Genap Taun Ke- 27 JKKK Taman Gamang di sebengkah retauran tebilang, semak ditu, bedau lama.
Nitih ku iya, bala ketuai komuniti kemaya hari tu patut nemu pekara ke bisi nyadi besemak sida, tanggungpengawa sida mar agi lalu seruran berubah seriris enggau ubah ke nyadi diatu ari empas penemu ekonomi, dunya sereta teknologi pemadah enggau arus penyambung ( ICT). Ba tu meh bala ketuai komuniti patut ngemeranka pengelandik sida gawa nyadi ketuai, ngiring enggau ngemansangka komuniti di menua sida.
“Nya kebuah bala ketuai komuniti patut ngayanka peminta enggau penemu komuniti di menua sida, sereta nejuka penguntung diri empu.
Ku iya, pemansang ti udah dijapai nengeri tu diatu asil ari pengeran enggau pengepuh perintah enggau bala ketuai ti bisi penau, dipilih rayat empu.
“Berindik ari nya, kaul ti mungkur semua rayat ti nyadi tagit pemansang deka seruran diberi pemerat enggau perati,” ku iya nerang silik.
Sama bisi datai Ketuai Kunsil Opis Pelilih Menua Sri Aman, Richard Tawan Sedu, Kaunsilor Lansing Bansi sereta bala kaban JKKK ke bukai.
Berebak enggau pengerami sehari nya, Harden mega bisi ngagihka belanja penyampau RM6,000 ungkup taun 2018 ngagai JKKK nya dikena bejalaika aktiviti sepanjai taun sida.
Nangkan nya, Harden mega bisi nyuaka insentif penyulut ngagai bala anak kaban JKKK ti teulihka penyulut dalam pemutus peresa perintah sereta bala kaban veteran JKKK.
Nya kebuah, bala ketuai JKKK endang patut diberi latih pengelandik ba semua pekara numbuh, ngatur, ngintu enggau ngemansangka JKKK ti bisi juluk, gawa ngatika diri, chakah sereta mansang. Datuk Francis Harden Hollis Menteri Muda Pengelantang Komuniti Sarawak