70 CCTV udah beoperasyen ba empat pasar besai di Miri
MIRI: Bisi 70 buah unit ‘Close Circuit Television’ (CCTV) udah dilekat lalu udah beoperasyen di empat buah pasar besai di mengeri tu.
Datuk Bandar Miri, Adam Yii madah 24 unit ari CCTV nya dilekat di Pasar Krokop 10 ditu, ke bisi pasar basah, kedai makai enggau bilik dagang ke bukai.
Di Tamu Muhibbah, sida udah ngelekatka 14 buah unit CCTV seraya 11 buah da agi dilekat di Tamu Kedayan.
Seraya di Pasar Komuniti enggau Pasar Perpaduan ti besepiak, raban penerit adat Majlis Bandaraya Miri ( MBM) udah ngelekatka 16 enggau lima buah unit CCTV dia enggau kandang besemak
“Kesemua pengawa masang 70 buah unit CCTV tu nelan belanja RM91,361.40 lalu udah dipejalaika MBM (nengah opis penerit adat iya).
“Tuju pengawa ngelekatka CCTV di kandang ngelinggi mengeri tu dikena nambahka pekara pengelikun enggau dikena mantau,” ku iya seraya nambah projek tu udah lama berengkah dipejalai lalu iya dilekat berenggat nitihka endur laban nguna belanja ke besai.
Adam mansutka pekara tu rambau aum bala kaban Kaunsil ti diatur di bilik konferen ditu, lemai kilah ensana.
Bejaku ngagai pengarang berita udah nya, iya ngarapka pengawa ngelekatka CCTV nya deka mantu neritka atur MBM matau kandang ngelinggi mengeri kelebih agi ba endur ditapatka mensia mayuh.
Sekalika iya bekaul enggau kes penyalah nyengkaum ngerumpak, enchuri tauka penusah bebadi, ku iya, nengah CCTV tu semua aktiviti ba endur nya deka dirikod.
“Nyema bisi sekeda kes nyadi sekalika bisi penyalah tauka penusah bebadi, kita deka muntang agi mansik kes nya enggau ngambi rikod ari CCTV nya,” ku iya nerang baru.
Sama bisi datai baum kemari Sapit Datuk Bandar, Julaihi Mohamad sereta Pemangku Sekretari MBM, Morshidi Fredrick.