12 iku nembiak nyulut SK Nanga Bangkit diberi peluang nemuai ke Johor, S’pura
KAPIT: Bisi 12 iku nembiak Primari Empat enggau Enam Sekula Primari (SK) Nanga Bangkit ti nyulut diberi peluang nyereta Program Nemuai Seraya Belajar pengelama lima hari ngagai Johor enggau Singapura rambau kemisi sekula Hari Deepavali, berengkah ari 16 ngagai 20 Oktober tu tadi.
Program berambaika jaku ‘Belelang Meh Menua 2.0’ disereta 12 iku nembiak ti udah dipilih dikena meri motivasyen enggau meransang sida ngambika seruran ngemeranka penyulut dalam pelajar sekula sida.
Penemuai sida diuluka pengajar Noorhazida Binte Abdul Wahad.
Dua taun ke udah, program ke sama mega kala digaga iya nya bala nembiak sekula ti dipilih udah dibai nemuai ngagai Kuala Lumpur enggau Melaka.
Penemu tu datai ari Chairman alumni sekula, Lidam Assan, siku nembiak sekula ti pegari nama lalu diatu nyadi pedagang Dayak Iban ti ngaul diri dalam kebun sawit.
Lebuhka dirandau, ku Lidam nerang, entara tuju meri peluang ngagai bala nembiak di menua pesisir meda pemansang di menua luar baka di Johor enggau Singapura.
“Kitai ngarap nengah program tu bala nembiak ari menua pesisir bisi peluang meda kediri empu pemansang menua luar ari menua Song enggau Sibu. Awakka mata sida empu meda lalu meransang diri bisi juluk besai nyadi orang ti pegari nama dudi hari,” ku iya.
Lidam ngena peluang nya meri terima kasih ngagai Sapit Menteri Pemansang Menua Pesisir enggau Kandang Menua Datuk Alexander Nanta Linggi ti nyukung program nya.
Sekeda palan narit ati ke bisi digusung sida iya nya palan sejarah enggau palan pelajar tinggi – Universiti Teknologi Malaysia (UTM), Zoo Johor, Muzium Tokoh Johor, Galari Seri Johor, Stadium Larkin enggau Legoland.
Dikearap penemuai ngagai Singapura manah agi sereta ngasuh bala nembiak gagit besemekih ngulihka penyulut dalam pelajar.