Pengawa raban veteran patut semampai dikenang
Penegap enggau pengelantang menua ke diatu asil ari pengeransing sida kelia ngetanka menua
KUCHING: Raban nembiak diperansang ngingat sereta beterima kasih ngagai raban veteran ke udah ngenukuka penegap, pemaik enggau pengelantang menua tu baka ti diasaika sehari tu.
Kepala Menteri, Datuk Patinggi Abang Johari Tun Openg madahka, taja pan raban nembiak enda kala ngasaika pemedis tauka pemerinsa raban veteran kelia ngetanka pengelikun menua tang nya ulih dipelajar nengah sejarah menua.
Iya madahka pengawa nulis sereta nyelak bup ulih meri peluang ngagai mensia mayuh kelebih agi raban nembiak pasal sejarah menua bekaul enggau pekara ke nyadi maya jeman komunis.
“Raban nembiak diatu patut beterima kasih ngagai raban veteran, laban sida tu ti udah chukup bebendar ngenukuka menua kitai stabil sereta dalam pemaik enggau pengelantang.
“Aku ngarika raban nembiak diatu meri besai terima kasih ngagai semua veteran ke udah bebendar deka mai pemaik sereta pengelantang enggau menua ti tegap.
“Baka bup tu (API - The Tiger of Kanowit ‘Memories of ACP Dato Lawrence Lim Eng Liong’) ngenang pasal pengawa niang ACP Dato, berengkah ari iya ke nyadi konstabulari polis nyentuka niki nyadi ketuai Pampang Khas dulu suba. Lalu raban nembiak patut macha bup tu,” ku iya.
Abang Johari mansutka pekara nya lebuh bejadika bup API - The Tiger of Kanowit ‘ Memories of ACP Dato Lawrence Lim Eng Liong ke diatur ba sebengkah hotel ditu, lemai kemari.
Berebak enggau tu Abang Johari besemaya deka meli bup nya urung 50 ngagai 100 buah, ngambika bisi diengkahka ba perpustakaan sekula ditu.
Kelimpah ari nya dalam jauku pengelalau, Manging Director Trac- Wheels( M) Sdn Bhd Richard Song Swee Jin madahka diri temgah ati laban udah mujur ngasil sereta nyelak bup ti ngingatka kenang enggau niang nya, ke udah nadai kena 7 Januari 2006.
Nitihku iya niang nya ada ba Rantau Dilang di Kanowit ba menua raban bansa Iban lalu niang tu suba ulih begulai enggau orang ke ngelinggi iya, taja pan ada bebansa Cina tang landik jaku Iban enggau Melayu kelimpah ari jaku English.
“Aku temegah ati bup pasal seiku bakih ke nyulut, seiku orang ke talukka menua sereta nyadi bujang berani Sarawak ulih dichelak dikena ngingat, ngenang sereta beterima kasih.
“Ditu aku deka madah bup tu dijual sereta asil deka diberi ngagai Ex-Policemen Association enggau badan Veteran soldadu di Sarawak,” ku iya.
Bup nya dichelak TracWheels (M) Sdn Bhd.
Api iya nya nama Iban niang ACP Dato ke diberi apai ambu Iban iya, Aya Lunang.
Sama bisi datai, Sapit Kepala Menteri Tan Sri Datuk Amar James Jemut Masing; Menteri ba Opis Kepala Menteri (Integriti dan Ombudsman) Datuk Talib Zulpilip; Sapit Sekretari Perintah Nengeri Datu Ismuni Ismawi enggau ke bukai sereta bala anak niang ACP Dato Lawwrence.
Raban nembiak diatu patut beterima kasih ngagai raban veteran, laban sida tu ti udah chukup bebendar ngenukuka menua kitai stabil sereta dalam pemaik enggau pengelantang. Datuk Patinggi Abang Johari Tun Openg Kepala Menteri