PCB, UKB Miri ngatur kimpin Laun Ngerejista Pengada kena 16-17 Nov

MIRI: Biro Aduan Awam SUPP (PCB) enggau kerejasama Unit Khas Bergerak (UKB) Pampang Miri deka ngatur kimpin Rejista Pengada Laun kena 16 enggau 17 November tu ila.

Ketuai Operasyen Biro Aduan Awam SUPP Miri, Erick Chin madahka kimpin diatur dikena mantu mutarka penanggul rayat ke nadai dokumen pengelala diri baka surat pengada enggau tingki.

Kimpin pengelama dua hari nya ku iya deka diatur di Kampung Sukan Petronas Miri berengkah ari pukul 10.00 pagi nyentuk 6.00 lemai.

“Sebedau tu kitai nerima bemacham tanya ari mensia mayuh pasal endur enggau servis penemu pasal penanggul rejista laun pengada,” ku iya nerang.

Berindik ari nya, raban PCB enggau UKB udah setuju ngemunka kimpin dikena mantu mutarka penanggul nya.

Bisi dua kaunter deka dibuka iya nya kaunter peminta baru enggau kaunter rejista peminta ti udah nganjung nama ngagai raban UKB dalam bulan Oktober tu tadi.

Peminta baru dipinta nganjung nama enggau lumur telefon aja lalu sida deka dikangau ba hari bulan enggau palan ti patut ila.

Erick Chin melabaka siti agi kimpin deka digaga dalam bulan Disember tu ila nyema bisi nerima timbal ti manah.

Kimpin ke udah diatur kena 17 Oktober 2017 tu tadi udah nerima timbal chukup manah, enggau nerima penatai 190 iku mensia mayuh.

Raban sida mega deka ngatur siti program meri penerang khas bekaul enggau pekara rejista laun pengada begulai enggau bala ketuai komuniti, Gerempung ukai Dikuasa Perintah ( NGO) sereta mensia mayuh enda lama agi.