Kaul rat JKKK, perintah nentuka pemujur projek pemansang

SRI AMAN: Pemansang ungkup rayat deka seruran diberi nyema bisi kerejasama rat entara Komiti Pemansang enggau Pengelikun Genturung Pendiau ( JKKK) enggau perintah.

Sapit Menteri Dalam Menua II Datuk Masir Kujat madahka enti nadai kaul ti teguh entara kededua raban nya, pengawa ngangkatka tikas pengidup rayat deka mar dipejalai.

“Kitai ngarapka tetiap kaban JKKK di serata nengeri terus meri sukung tegap ngagai perintah dikena ngemuntangka pejalai pemansang ngagai kandang menua ti begunaka pemansang,” ku iya.

Masir ke mega Kaban Parlimen (MP) Sri Aman mansutka pekara tu lebuh bejaku ba Program Pemesai Begulai Enggau Rayat di Rumah Edwin Padang, Sungai Indai Atas semak ditu, pagi kilah ensana.

Nitih ku iya, perintah seruran ngemeratka pekara pengelantang rayat, kelebih agi peranak di menua ulu, nengah pejalai projek ti ulih ngangkatka tikas ekonomi rama sida.

Berebak enggau nya, Masir meransang bala kaban JKKK ngemeratka pekara pelajar bala anak sida.

“Pekara pelajar bala anak kitai mega patut diberi pemerat laban pelajar tu nyadi senyata enggau keresa pemadu berega ungkup sida neruska pengidup dudi hari,” ku iya.

Nyerumba program nya, Masir mega bisi nyuaka geran perintah penyampau RM 30,000 ngagai JKKK Rumah Edwin manakala RM 2,000 ti disua ngagai Gerempung Indu rumah panjai nya dikena bejalaika aktiviti semanjai taun sida.