Bank CIMB Sri Aman udah nyuaka Projek CSR ngagai peranak Rumah Siliver Garit
SRI AMAN: Bank CIMB Sri Aman udah nyuaka Projek Tanggungpengawa Rama Korporat (CSR) perengka rumah ngagai tetiap ketuai bilik peranak Rumah Siliver Garit, Kampung Kenyungan, Batu Lintang Undop semak ditu, ensana.
Pengari ari Bank CIMB Sri Aman madah pengawa nyerahka projek nya dikena mantu sida ti tasah angus ari Rumah Panjai Siliver nya ngentak rumah panjai baru pengudah sida dituntung penusah angus pun taun tu tadi.
“Pengawa nyuaka projek bantu tu nyadi siti ari tanggungpengawa rama enggau ngintu pengelantang pendiau ari Bank CIMB Sri Aman kelimpah nyadi siti ari aktiviti korporat rama Institusyen Wang nya mantu komuniti ti begunaka bantu.
“Projek ti dipejalaika tu taja enda mayuh tang abis nadai iya ulih ngelempungka tating penusah sida ti tasah angus ditu kelimpah nambahka agi bantu ti udah diberi ejensi perintah, peribit enggau orang ngatika diri sebedau tu,” ku iya.
Dulu agi ari nya, pengawa nyuaka kereban projek baka batu bata, atap zink sereta kereban berumah ke bukai udah dipenyadika Menteri Muda Pengelantang Komuniti ke mega Kaban Kunsil Nengeri (ADUN) Simanggang, Datuk Francis Harden Hollis.
Ku Harden lebuh bejaku bejadika pengawa nya, ngarapka pemeri kereban berumah ari Bank CIMB Sri Aman ulih dikena peranak rumah panjai nya memanah, ngentak baru rumah panjai sida.
Pia mega ku iya, nyadi pengari rayat di kandang menua nya begulai enggau Kaban Parlimen ( MP) ke mega Sapit Menteri Dalam Menua, Datuk Masir Kujat mega udah ngagihka belanja besai ngagai peranak rumah panjai nya dikena mantu sida ngentak rumah baru.
Sama bisi datai Sapit Chairman Kaunsil Pelilih Sri Aman, Kunsilor Andar Suntai, Ketuai Raban Indu Parti SUPP Simanggang, Ling Siew Hung sereta bala ketuai raban bansa ke bukai.