SUPP numbuhka komiti mit ungkup servis ti meruan ngagai komuniti
MIRI: Komiti mit di renggat keterubah patut ditumbuh di tetiap genturung pendiau sereta kandang menua dikena ngemuntangka juluk sereta servis ti meruan ungkup rayat.
Menteri Muda Dagang Temuai, Seni enggau Main Asal Datuk Lee Kim Shin ke lalu nyadi Kaban Kunsil Nengeri (ADUN) Senadin merambu dekaka pengawa numbuhka komiti mit baka nya di sebuah genturung pendiau enggau kandang menua ti besai, ngambika komiti nya nyamai ngaul diri enggau rayat sereta ngenataika servis ti meruan.
Bejaku rambau bejadika aum besai ke-4 SUPP Pampang Senadin di balai begunan parti nya ditu, kilah ensana, Lee dekaka semua kaban parti nya di tetiap pampang mit gawa begulai enggau iya nyadi siti tim ti meri servis pemadu manah ngagai rayat.
“Aku siku aja enda ulih ngereja iya (laban sitak DUN Senadin ti besai enggau penyampau tubuh peranak ti nambah), nya kebuah aku begunaka siti tim ti kering lalu kitai gawa begulai,” ku iya.
“Kitai deka numbuhka komiti di renggat keterubah baka di genturung pendiau ngambika kitai ulih ngaul diri semak enggau rayat,” ku Lee seraya ngelalau bala kaban parti ngambi bejalaika servis ngagau rayat nadai ngira asal penatai, bansa enggau jalai pengarap.
Ku Lee, kenyau ari tiga taun ke udah, pengudah iya dipilih baru nyadi pengari di sitak nya, mayuh pemansang udah diasai enggau dipejalai nyengkaum pengawa ngemanahka jalai besai ari dua lurung ngagai empat lurung sereta mayuh ke bukai.
Dalam jaku dipansutka iya madahaka diri dekaka bala kaban parti ke bisi diatu chakah agi ngambi kaban baru ke alai diatu kaban SUPP Senadin ari 5,000 iku tiga taun ke udah diatu manggai lebih 7,000 iku taun tu.
Kaban SUPP di Senadin mega ku iya, ngerikod penyampau tubuh pemadu tinggi ba Raban Nembiak iya nya lebih 2,000 seraya Raban Indu lebih 5,000, penyapai ti chukup manah.
Ngelansa pasal aum kemari, sepenemu ngemendarka 45 iku kaban komiti baru ti udah dipilih ngetuai pampang Senadin ungkup timpuh tiga taun da agi.
Betuaika Lee ti nyadi Chairman SUPP Pampang Miri, bela meda pengawa nyiri Chai Kuen Ming nyadi sapit iya, sereta empat iku mandal chairman iya nya Kueh Chie Tiong; Goh Khiok Seng; Chong Ah Muk enggau Joanna Ping Eng Oyok.
Mangku pengawa sekretari Jeffery Phang ti dibantu tiga iku penulung sekretari, Chin Haw Leong, Chong Khee Fah enggau Riti Assan.
Seraya Tukang Wang Jee Kee Hiong dibantu Thian Siew Foong seraya Tang Siong Chung dipadu nyadi ketuai Raban Nembiak lalu Yap Siew Jin nyadi Ketuai Indu, ke bukai datai ari bala kaban komiti pampang.
Lee mega bisi ngemendarka ari penyampau 45 iku komiti nya, bisi 28 iku deka dipilih nyadi deligit ngarika pampang Senadin ngagai Aum Besai Tiga Taun Sekali SUPP di Kuching kena 22 ngagai 23 Disember tu ila.