Kelas belajar main asal ASADIA deka dikerembai ke Serian
KUCHING: Akademi Serakup Dayak Iban Sarawak (ASADIA) merambu deka ngerembaika kelas belajar main asal ngagai kandang menua dalam sitak Kunsil Nengeri (DUN) Bukit Semuja, di Serian ba pun taun 2018.
Ketuai Akademi Serakup Dayak Iban Sarawak (ASADIA) Mabong Unggang madah, akademi nya deka besaup ngerembaika kelas belajarka main asal nya enggau pengari rayat sitak nya.
Mabong amat ngarapka kaban politik tauka bala YB terus meri sukung ngagai pengawa Asadia ti deka ngerembai sereta ngemansangka main asal bansa baka ajat Iban, ajat Bidayuh, kuntau, tabuh enggau ke bukai ti diatur kenyau ari taun 2013.
“Aku beterima kasih ngagai Kaban Kunsil Nengeri (ADUN) Bukit Semuja John Ilus ti meras bendar ngasuh mensia mayuh dalam sitak ke diarika iya belajarka main asal Dayak.
“YB John tu bisi udah merambu deka begulai enggau Asadia ngerembaika main asal ngagai raban Dayak dalam sitak iya.
“Juluk iya (YB) tu laban deka ngangkat sereta ngetanka main asal Dayak dalam ditak ke diarika iya. Tu diperambu deka dipenyadi ba pun taun 2018,” ku iya.
Ngarapka deka mayuh agi YB tauka ADUN ke bukai ulih neladan pengawa pengari rayat nya ti bebendar deka ngetanka main asal bansa diri empu, ku Mabong.
Nitih ku Mabong, akademi nya deka ngerembaika kelas belajar main asal ngagai Genturung Pendiau Rasau di Serian berindik ari ke nerima timbal ke manah ari peranak menua nya ke tebal agi bansa Dayak.
“Asadia deka ngatur pengawa ngerembaika main asal bansa Dayak ngagai Genturung Pendiau Rasau di kandang menua Serian, ti diuan tebal agi Dayak Bidayuh enggau sekeda bansa kitai Iban.
“Kelas tu bisi nerima sambut ti manah ari raban nembiak enggau besai tuai,” ku iya madah ngagai Utusan Borneo.
Asadia, kenyau ari ditumbuhka ba taun 2013 nyentuk ke taun 2017 udah mujur ngelatih tauka ngajar urung 850 iku orang enda ngira renggat umur, lalu kelas nya ukai semina diajar ba Indu Opis Sadia tang nyengkaum ba genturung pendiau enggau palan bebeli barang di mengeri tu.