Raban pedagang, pengemeran industri di Sarawak dipinta nyaup nentuka bala graduet enda gawa jauh

KUCHING: Raban pedagang sereta pengemeran industri di Sarawak dipinta nyaup nentuka graduet peranak Sarawak meri servis ba nengeri diri.

Kepala Menteri Datuk Patinggi Abang Johari Tun Openg madah raban graduet chukup berat ba pelin perintah ti keran deka nyingkang ba digital Sarawak sereta pengawa bukai ke bekaul.

“Dikena nentuka kitai mujur ba semua pelin pemansang ke udah ditusun, ngenanka graduet mengkang di nengeri tu lalu meri servis ditu nyadi sebengkah pekara ke pemadu berat,”ku iya.

Abang Johari mansutka jaku nya ba Pengerami Ngintu Genap 25 Taun Universiti Teknologi Swinburne ke diatur ba seiti hotel ditu, ensanus.

Iya nambah, pengeran perintah nyingkang ba ekonomi digital ngujungka penumbuh sekeda ejensi ditu.

Ku iya, pekara nya ngu-

Dikena nentuka kitai mujur ba semua pelin pemansang ke udah ditusun, ngenanka graduet mengkang di nengeri tu lalu meri servis ditu nyadi sebengkah pekara ke pemadu berat. Datuk Patinggi Abang Johari Tun Openg Kepala Menteri Sarawak

jungka pinta ba modal mensia ke landik majak mayuh kelebih agi ungkup graduet.

“Berindik enggau nya, sida (graduet peranak Sarawak) patut enda mindah meri serbis ke nengeri bukai.

“Kitai ngembuan mayuh pengeraja asal lalu semua tu begunaka orang ke pintar ngambi ulih dikerembai ungkup pemaik Sarawak,”ku iya.

Ngenang kaul ke sama, Abang Johari madah pengelandik enggau penau ke dikembuan graduet ari Universiti Swinburne Sarawak chukup diguna.

Sida ku iya ulih nyaup ngemujur sereta nyukung ekosistem ungkup pekara ke bekaul enggau ekonomi digital.

Bela datai Sekretari Perintah nengeri Tan Sri Datuk Amar Mohamad Morshidi Abdul Ghani, Menteri Kerejaraya Dato Sri Fadillah Yusuf, Menteri Pekara Pelajar, Sains enggau Pansik Teknologi Dato Sri Michael Manyin, Menteri Opis Kunsil enggau Pengawa Berumah Datuk Dr Sim Kuih Huan sereta CEO Universiti Teknologi Swinburne kampus Sarawak Profesor Ajay kapoor.