UPP meruan sebilik enggau BN, bela nerima MRP ungkup rayat

SIBU: Parti Rayat Bersatu (UPP) ti sebagi agi ari parti pro Barisan Nasional (BN), nangam kaul ti manah ukai semina begulai enggau perintah nengeri aja tang mega enggau perintah besai.

Chairman UPP Dudong Datuk Tiong Thai King madah, tu nyengala dipeda maya semua pengari rayat ari UPP bela dikangau betemu enggau Menteri Besai Datuk Seri Najib Tun Razak empai lama tu tadi.

“Kepala Menteri Datuk Patinggi Abang Johari Tun Openg enggau Menteri Besai Datuk Seri Najib Tun Razak madahka UPP tu diri sebilik enggau BN.

“Pengari rayat UPP mega sama diungkupka geran projek mit menua pesisir (MRP) ti disadung ngagai rayat pegai diri empu,” ku iya.

Tiong ti mega Kaban Kunsil Nengeri (ADUN) Dudong mantaika jaku tu maya ba Program Outreach UPP Dudong ba Palan Servis UPP Sibu Jaya, kemari.

Program ke diatur Komiti Bumiputera UPP Dudong nya bela digulu Ketuai Indu UPP Dudong Connie Loh, chairman komiti pengatur Sobri Sandom, chalun UPP ungkup Parlimen Lanang Andrew Ting sereta bala bukai.

Ku Tiong, kaul ke manah nya deka ngemuntangka pengawa numbuhka macham bengkah program enggau projek pemansang perintah nyengkaum ungkup rayat di Sibu Jaya.

Taja baru tiga taun ku iya, UPP udah nerima sukung ke manah ari rayat ti tau dipeda maya pengawa bepilih nengeri empai lama alai lima iku chalun UPP mujur menang.

“Naka ke diatur UPP udah mujur nyadi platform politik ke likun sereta diterima rayat.

“Kitai semua nemu dunya diatu dunya ti nadai beantara. Tang UPP deka nitihka serunyut ubah tu seririh enggau tuju mai pengelantang ngagai rayat.

“UPP naka alah deka bejadika program enggau projek pemansang di menua pesisir ngambika rayat deka sama enda betinggal ngasaika pengelantang,” pia ku iya.

Bekaul enggau program sehari nya (kemari), Tiong madah, program nya deka meri awak ngagai rayat betemu mua enggau raban UPP.

“Ngarapka Program Outreach tu mai penyerakup lalu mujur mutarka penanggul ke bisi nyadi,” ku Tiong.