Hang dipinta betelefon nuju sida sebilik ti benung ngiga iya
KAPIT: Kadut Anak Ranggau ari Kapit nyidi dini pendiau ipar iya, Hang Chuang, seraya minta Hang telefon ngena lumur 019 707 4526 tauka 014 877 3817, nyema bisi macha berita tu.
Ari tusi mulut iya, Kadut Anak Ranggau, indu Iban, 70 taun, iya bini niang Hang Siong, midang di Kapit kira tiga taun ke udah.
Niang Hang Siong menyadi tuai Hang Chuang.
Seduai menyadi tu endang peranak asal menua China lalu diau mendam di Miri. Lebuh nya, menyadi tuai iya, Hang Siong gawa di kem batang di Marudi. Menyadi biak, Hang Chuan enggau bini iya ti benama Chai Lee Fah enggau dua iku anak seduai muka kedai ngaga kek di Miri.
Kaul sida sebilik rapas pengudah Hang Siong mindah ke Kapit lalu Hang Chuang mindah ke Kuching. Kenyau ari nya, sida nadai agi nemu rita pangan diri lalu udah manggai 40 taun.
“Umur aku diatu udah manggai 70 taun. Menyadi tuai nuan, Hang Siong udah midang tiga taun ke udah ketegal sakit tuai.
“Aku ngandalka diri ulih betemu enggau nuan, (Hang Chuang tauka sida sebilik) sebedau aku madamka seput.
“Menyadi tuai nuan enggau aku empu, diau mendam di Kapit pengudah kami ngejang ari Marudi, 40 taun ke udah.
“Kepenudi iya aku ninga ari Hang Siong, kita udah mindah ke Kuching. Kenyau ari nya, kitai nadai ninga rita pangan diri. Aku agi ingat lebuh kami mindah ke Kapit, Hang Chuan baru beumur 30 taun,” ku Kadut nikalka kenang iya.
Ku Kadut, iya semina bisi ngembuan dua iti gambar lama – siti gambar niang laki iya, Hang Siong, enggau dua iku anak seduai lalu siti agi gambar Hang Chuang.