PBB Piasau ngandalka semua penuduk tetinggi PBB enda berubah

MIRI: Parti Pesaka Bumiputera Bersatu (PBB) Piasau dekaka semua penuduk tetinggi dalam parti pemadu besai Sarawak nya dinan maya Gempuru Besai PBB dalam taun baru.

Chairman PBB Pampang Piasau, Kunsilor Sardon Zainal madahka sida sepenemu setujuka semua penuduk tetinggi enda diperebut maya pengawa bepilih PBB ila.

“Semua penuduk tetinggi tu patut ditan ngambika semua agenda pemansang nengeri seruran dipejalai pulaika pengelantang rayat enggau parti,” ku iya, ditu, kemari.

Sardon madahka resolusyen tu nyata ngayanka bala kaban PBB nyukung ketuai dipegai Kepala Menteri ke lalu nyadi Presiden PBB, Datuk Patinggi Abang Johari Tun Abang Haji Openg.

“Kitai beratika rintai tetinggi diketuai Datuk Patinggi Abang Johari Tun Openg sereta sapit iya, Datuk Amar Awang Tengah Ali Hassan enggau Datuk Amar Douglas Uggah deka nampung pejalai agenda pemansang Sarawak,” ku iya.

Ba lansa ke sama, Sardon ngansal semua kaban PBB enda mudah mending tauka tempawah runding enggau raban ti nguji ngachau pengelantang rayat Sarawak.

“Tu nyengkaum isu ti ditabur nengah media rama ti ulih ngerachun runding bala ke macha dataika sida tepejuh lalu nyalahka perintah,” ku iya nerang.

Sardon ngaku bisi sekeda orang jampat pechayaka isu ti ditabur ba media rama, tuju iya deka ngeruga penyerakup Sarawak.

“PBB Piasau ngarapka rayat Sarawak kelebih agi ditu enda jampat saru penemu enggau ideologi raban penyakal ti sengaja ngiga jalai numbangka penegap Sarawak ba semua pekara,” ku iya nerang.

Ba lansa ke bukai, Sardon sekali agi dipilih nyadi Chairman ngetuaika PBB Piasau rambau pengawa bepilih Aum Deligit PBB Pampang Piasau seraya Putit Pekok dipadu nyadi sapit iya.

Semua semilan rating mega bisi dipilih nyadi Kaban Komiti PBB Piasau.