Pengelikun rampa menua patut diintu semua komuniti: Ding
SARIKEI: Pengawa nentuka pengelikun enggau pengelantang rampa menua ungkup komuniti iya nya nyadi tanggungpengawa begulai.
Senentang pekara tu, semua bala kaban komuniti patut beratika tanggung- pengawa sida, pia ku Kaban Kunsil Nengeri ( ADUN) Meradong, Datuk Ding Kuong Hiing, lebuh ngelancharka kimpin Ngemunaska Penyalah enggau Pengelikun Komuniti Bagi Menua Sarikei di palan sivik ditu, Hari Minggu tu tadi.
Iya muji pengawa Opis Penyerakup Menua Enggau Intergrasyen Nasional (JPNIN) ti nunda program nyadi siti ari aktiviti besehari sehari di Komiti Rukun Tetangga (KRT) di serata nengeri.
Berindik ari program tu ngaul mayuh bengkah ejensi perintah sereta gawa rat begulai enggau bala komuniti, iya pechaya penemu udah dilanggur ari Strategi Tasik Gadung Nasional (NBOS) ari tibak penemu Menteri Besai Datuk Seri Najib Tun Razak, ku Ding.
Iya pechayaka pengawa numbuhka unit Volunteer Patrol Scheme ( SRS) di baruh program tu ti gawa matau pengawa salah di kandang genturung pendiau, ku iya.
“Aku berasai temegah ati meda program tu nyadi strategi bekunsika tanggungpengawa nentuka rampa pengelikun enggau pengelantang ungkup semua orang ti diau dia,” ku iya nambah.
Taja pia ku Ding, iya begunaka kerejasama rat, tim gawa begulai enggau peny- erakup semua raban dikena nentuka program tu nyapai juluk iya.
Entara bala ke bisi datai Direktor JPNIN Nengeri Dirwana Azool, Sekretari Politik Kepala Menteri Teng Ung Woo sereta bala ketuai opis perintah ke bukai.