Peranak Rh Johnny majak ngasai pemansang
KAPIT: Kaban Kunsil Nengeri (ADUN) Bukit Goram, Jefferson Jamit Unyat madahka peranak Rumah Johnny Undi udah mansang enggau meruan ba pekara infrastruktur enggau penyikap perengka guna ngelama tu.
“Peranak diatu ngasaika perengka guna ti meruan agi dibanding enggau pun taun tu. Sida ngasaika pemansang enggau sambung jalai, bekal kuasa karan 24 jam sereta bekal ai beresi ngagai semua ruang bilik. Pengidup mega nyadi mudah agi ke alai semina 15 minit deriba ari pasar,” ku iya lebuh bejadika Pengawa Ngentak Rumah Panjai Baru di Rumah Johnny Undi, Jalai Bukit Goram, Sungai Kapit ditu, lemai Hari Dua tu tadi.
Ku Jamit, sebedau Pengawa Bepilih Nengeri (PRN) 2016, iya kala nemuai kia, ngagai Rumah Johnny Undi. Lebuh nya, iya agi nyadi Sekretari Politik Kepala Menteri Sarawak.
Iya nemuai pulai hari sekali tu bejadika pengawa ngentak rumah panjai baru di Rumah Johnny Undi. Tujuh pintu deka digaga nyadi 20 pintu rumah panjai.
“Ngagai semua pengundi di Jalai Bukit Goram, Sungai Kapit enggau Jalai Ulu Sungai Yong, aku meri terima kasih ke sukung kita ti udah ngundi aku rambau PRN. Aku menang enggau majoriti besai laban sukung nadai bebagi ari kita.
“Nyadi pengari rayat, nyadi tanggungpengawa aku naka ulih gawaka kita sekumbang ke mangku pengawa tu,” ku Jamit.
Iya mega meri terima kasih sereta ngenang pemaik semua ketuai opis perintah enggau ketuai komuniti kelebih agi bala Temenggong, Pemancha enggau Penghulu ti udah nyukung iya.
“Bala kita seruran bisi nyempulang ngulu program di rumah panjai. Tu ngayanka kitai (bala pengari rayat, ketuai opis enggau ketuai komuniti) seruran begulai nyadi siti tim ngaul diri semak di pun menua sereta sedia gawa. Penaluk Segulai Sejalai nyadika penegap kitai gawa,” ku Jamit nerang.
Jamit nyemetak madah pemesai guna gawa begulai nyadi siti tim ti patut dikemeran, Segulai Sejalai dikena nangkup peminta bala pengundi.
“Kitai bejalaika pengawa ti beguna endar ngenataika servis kitai.”
“Kelebih agi, lebuh agi gawa nyadi Sekretari Politik Kepala Menteri Sarawak, aku seruran gawa ngagai menua sereta gawa begulai enggau Kaban Parlimen (MP) Kapit, Datuk Alexander Nanta Linggi ke mega nyadi Sapit Menteri Pemansang Menua Pesisir enggau Kandang Menua, nentuka bala pengundi teulihka pemaik ari program pemansang perintah,” ku Jamit nerang.
Ku iya, Pengawa Bepilih Besai (PRU) enda lama agi. Penyandang chalun BN P215 Kapit Datuk Alexander Nanta Linggi deka ngetanka penuduk iya.
“Beri sukung nadai bebagi ngagai Nanta nentuka iya ulih menang enggau majoriti besai.”
Ngenang pasal pengawa baru dipejalaika perintah nengeri ba pemansang ekonomi, Jamit minta rayat kelebih agi raban nembiak nambahka pengelandik jari sida ba pekara ICT laban perintah nengeri bejalaika ‘Ekonomi Digital’.
Ku iya, beguna endar nguasa komputer enggau internet.
“Kemaya hari tu, pedagang bedagang nengah internet. Sida muka website, facebook, enggau ke bukai dikena mandangka produk sida.
“Pua kumpu ari Sungai Mirirai, Ulu Baleh dibantai ba internet ulih dijual ngagai serata dunya. Tu gaya baru pedagang enggau pengelebih teknologi enggau dunya ti nadai sekat,” ku Jamit.
Berebak enggau nya, iya ngemendarka agih belanja ungkup taun 2018 bela penyampau RM1,000 ngagai 27 iku tuai bilik lalu RM6,000 ngagai Biro Indu Rumah Johnny Undi. Semua penyampau belanja tu manggai RM33,000.
Sapit Tuai Rumah Ring- git Unaun, Sapit Sekretari Kaunsil Pelilih Kapit Kelimbit Sibat, Menijar Palan Sivik Kapit Bakat Gira, Kaunsilor Liew Hua Hua, Kunsilor George Tang, Pemesai Nembiak enggau Lumba Kapit Jack Janda, Pemesai Pemadah Kapit Garai Entili, Pemesai JASA Officer Mohd Matan Yok, Penyelia KEMAS Patrick Gong, Temenggong Wilfred Billy Panyau, Pemancha Enggin Nyipa, Penghulu Wong Kie Ing, Penghulu Pasang Tubah sereta bala bukai antara ke bisi datai.
Sama bisi bejaku Pemesai Pekara Khas Nanta, Ambrose Abong, Temenggong Wilfred Billy Panyau, Pemancha Enggin Nyipa enggau Sapit Tuai Rumah Ringgit Unaun.