Palan ngenduh sementara di Kakus udah sedia napi penusah ampuh bah
SIBU: Bisi 16 buah palan ngenduh sementara ba kandang menua Kakus udah sedia taja pan tikas ai di Sungai Anap, Tatau, agi baruh naka ke diatu, pia ku Menteri Muda ba Opis Kepala Menteri (Undang-Undang enggau Adat Bumiputera) Datuk John Sikie Tayai.
“Nadai ujan ti nyengala bangat lalu kami matau pekara ke nyadi enggau semak agi.
“Bala komiti betuaika Pemesai Pelilih Tatau seruran ngadang diri,” ku Sikie ke mega Kaban Kunsil Nengeri (ADUN) Kakus, madah kemari.
Nanga Tau, Kuala Muput di Ulu Anap, Long Biak, Kuala Penyarai, Lubok Kubong antara kandang menua ti suah ampuh bah di Kakus.
Dalam bulan Januari taun tu tadi, ujan nadai ngetu udah ngujungka ai Sungai Kakus melema sereta ngampuhka tebing enggau sekeda kandang menua ke baruh di Anap enggau Ulu Arip. Penusah tu udah ngunjungka Sekula Primari (SK) Kuala Penyarai tutup, 91 iku nembiak sekula nya di- anjung pulai ke rumah.
Berebak enggau nya, nitihka website iHYDRO’s, ai ujan pemadu tinggi udah dirikot palan hidrologikal di Ulu Sungai Pelugau kenyau ari tujuh hari ke udah iya nya 120mm, kena 11 Disember.
Semua gaya penyampau ujan ba kandang menua nya - 6 Disember (7mm); 7 Disember (26.5mm); 8 Disember (12.5mm), 9 Disember (15mm) enggau 10 Disember (5mm).
Palan hydrologikal di Nanga Merit, Bagi Menua Kapit bisi ngerikot ujan bangat urung pukul 2.30 lemai kemari, ke alai komuniti di menua nya dilalau ngambika seruran bejejaga.
Gaya penyampau ujan tetiap sejam iya nya 37.5mm.
Nitih ku Opis Ngemataka Gaya Hari, musim landas – dipelaba nyentuk bulan Mac taun baru, tau ngasuh bah besai ba kandang menua baruh enggau ke suah ampuh bah.
Apin lama ke udah, Sapit Kepala Menteri Datuk Amar Douglas Uggah Embas, ke mega Chairman Komiti Mutarka Penusah Ngenyit Nengeri, madahka semua 21,188 iku pemesai enggau raban ari tujuh opis enggau ejensi deka ngadang diri maya musim landas tu.
Ku iya, tu sebagi ari pengawa bala komiti nyendiaka semua bantu ke patut dikena nentuka pemujur pejalai operasyen maya napi penusah ngenyit.
“Lalu tentu mega ujan bangat ditambah enggau pasang raya, penusah ampuh bah deka balat agi nyadi,” ku Uggah madah ngagai pengarang berita pengudah nyadi chairman aum komiti ba bilik operasyen iya di Wisma Bapa Malaysia di Kuching.