CNS nyukung gaji khas staf perintah ditikika dua taun sebedau taun 2020
SIBU: Penemu minta orang kereja perintah ditikika gaji khas dua taun sebedau taun 2020 bela disukung Kongres Gerempung Orang Gawa Perintah (Cuepacs) Sarawak.
Presiden Cuepacs nengeri (CNS) Ahmad Malie madah, peminta nya ke dibantai Presiden Cuepacs menua Datuk Azih Muda engkeman digaga diatu bepun ari belanja pengidup majak niki.
“CNS bela sepenemu enggau Datuk Azih Muda ti minta perintah nikika gaji khas dua taun sebedau 2020.
“Ba piak kitai, penemu tu engkeman bepun ari perintah nengeri nadai bepenanggul meri bantu wang khas, kelebih agi ari nama ke dipadah perintah sebedau tu,” pia ku iya ensana.
Ahmad madah, perintah besai tau bechuntoka perintah nengeri kelimpah penemu ari perintah menua bukai ti madahka ekonomi menua tu entap baka ke dipadah perintah.
Iya mantaika penemu tu maya dipinta ngelansa jaku Aziz ke minta perintah berundingka dua bengkah perambu ke dipeda tau ngelempungka tating pengidup lebih 1.6 juta iku orang gawa perintah.
Ku Azih madah, Cuepacs melabaka orang kereja perintah deka napi penanggul taun ti deka datai bepun ari belanja pengidup majak tinggi enti dibida enggau gaji ke diterima sida ninting bulan.
Iya madah, taja perintah bisi meri insentif mimit ke dibayar berengkah bulan Januari ti deka datai tang tu enda tetapika nama penyuntuk orang kereja perintah ba timpuh ke lama.
Nya alai, Azih madah, Cuepacs ngarap perintah berunding meri insentif gaji niki ninting taun dulu tang ukai nekat gaji niki ke patut diberi sida ba taun nya.
Ba Ahmad, nikika gaji dua kali lipat sebedau taun 2020 bela ngayanka tikas ekonomi menua tu entap sereta tegut.
“Ngarapka perintah besai ulih berundingka pekara tu,” ku iya madah.