Kelab Lion Kapit patut ditunda, NGO ti chukup chakah gawa

KAPIT: Kaban Kunsil Nengeri ( ADUN) Bukit Goram Jefferson Jamit Unyat dikangau nyadi temuai dipebasa aktiviti ‘4 dalam 1’ diatur raban Kelab Lion Kapit ba sebengkah restauran ditu, apin lama ke udah.

Jamit dalam jaku dipansutka iya muji Kelab Lion Kapit, nyadi siti gempung ukai dikuasa perintah (NGO) di pasar ke chukup chakah gawa, laban kelab seruran ngatur aktiviti meri bantu ngagai sida ti begunaka bantu kelebih agi maya penusah ngenyit baka bah tunggal tauka angus rumah, nyediaka bantu barang pemakai ngagai sida ke tasah.

Ku iya, rambau penusah tanah tusur ti nuntung Rumah Gawan, Lepong Baleh, apin lama ke udah, Kelab Lion begulai enggau Red Crescent sereta SUPP pampang Kapit bisi nganjung bantu barang pemakai.

Iya minta NGO ke bukai nunda pemanah pengawa raban Kelab Lion ti chakah gawa mantu bala komuniti di menua.

Iya ngenang projek bepelasarka komuniti ke bukai dipejalaika Kelab Lion dalam pun taun tu tadi, projek nyemin paking kereta di baruh rumah indu misi Sepital Kapit. Projek tu ke amat digaga ngambika mayuh agi endur paking kereta ungkup bala staf sepital.

“Ketegal pengeran enggau pengiruh kita volunteer gawa ngintu pengelantang bala komuniti, nya kebuah aku rindu nimbal peminta kita laban nemu kita ngena belanja nya memanah.

“Servis komuniti kita bejalaika pengawa perintah mantu rayat. Nyadi pengari rayat, aku meri terima kasih ba pemanah tuju pengawa kita. Aku naka ulih mantu kita,” ku Jamit.

Iya beratika raban kelab nya bisi penau sereta disiplin. Antara sida mayuh megai pengawa nyadi chairman ba mayuh bengkah NGO di pasar nya. Ambika chunto Dr Sia Tih Kong nyadi chairman Malaysian Red Crescent Kapit Chapter, Sii Bang Ee chairman Serakup Foochow, Sng Geok Yien chairperson Serakup Chiang Chuan, Ting King Yiing chairman Serakup Nimbakka Laja Bagi Menua Kapit, Moonly Tiang chairperson Palan Pemulai Pemanah Ulah Belalauka Komuniti Kapit sereta ke bukai.

Ba lansa bukai, Chairman Pengatur, Anthony Jalin Manggie nerangka aktiviti 4 dalam 1 ngaul pengawa Hari Diri Sebilik Lion, Ngintu Hari Pengada sida ke ada penggal kedua taun 2017, gempuru Hari Krismas sereta Ushering Taun Baru 2018.

Presiden Kelab Lion Ting Bee Eng, Dr Sia Tih Kong, David Ling, Kapitan Yap Hui Le, Kaunsilor Yii Si Geok sereta bala bukai antara bala ke bisi datai.