Pengawa nutup latih kuntau diajar Guro Nyawai nitih adat ke berurun
SIBU: Chukup ngena adat ti berurun, Guro Nyawai Limbie nirika Ranyai Kuntau dikena ngatur pengawa tamat guro enggau tamat kuntau 27 iku nembiak iya.
Ba pengawa ke diaduka iya di Jalai Oya tu kemari, iya bisi nyuaka siti Selampai enggau Tali Pinggang Chelum sereta tiga iti Selampai enggau Pinggang Mansau.
Selampai enggau Pinggang Chelum tu diberi iya ngagai Raymond Geru.
Nangkan ke tu Raymond dipaduka iya tau ngajar kuntau tang empai datai ba tikas nyadi guro.
Raymond udah belajar bekuntau enggau iya ba pengelama lima taun ke udah.
Nyema nadai nanggul iya tau nyadi guro enti mujur belajar 10 kali agi ba Guro Nyawai.
Sida tiga ke nerima Selimpai enggau Pinggang Mansau maya tu iya nya Ricky Belaja, Hillary Bantan enggau Roland Juki.
Tu nyadika ke kelai sida tau nyadi penulung guro.
Pemeri tu mujur diempu sida tiga bepun ari ulah ke manah sereta mentas belajar kuntau kelimpah dipeda endang bebendar deka besaup ngangkatka main lama tu.
Guro Nyawai maya berandau enggau pengarang berita ba pengawa tamat nya kemari madahka iya endang ransing ati deka bedua penemu bekuntau ngagai rebak baru ketegal umur iya ti udah tuai.
“Enti udah maya iya aku endang deka meri sida (nyadi guro) nyema sida endang beamat-amat mujur belajar kuntau.
“Ba aku, penemu meseti dibagi ngambika pengawa bekuntau tu ulih ditan nyentuk ke ila-ila,” pia ku iya madah.
Nerangka reti Ranyai Kuntau ti didirika iya maya nya, ku iya, ranyai tu endang digaga tiap maya bisi tamat guro.
“Kebuah pia laban enggai ke alah bulu tinggang nem- biak ke diajar.
“Nama kitai nirika Ranyai Kuntau ti bisi ngena Sabang Sumpah dia nembiak ke deka nyadi guro lalu besumpah, enda ulih jai,” ku iya madah.
Ku iya, enti ba menua ditu, ranyai tu jarang amat digaga tauka nadai didirika dibida enggau sida ke tamat kuntau tunga ke Batang Kapuas, Indonesia.
Madah enggau nyemetak, ku Guro Nyawai, Ranyai Kuntau tu didirika ngena batang pisang enggau pinang.
Iya madah, batang pisang dikena ngayuka chelap, jampat nyumbuk, beranak sereta jampat ngerembai panjai.
Pinang ku iya, enda tau ditinggal laban nya endang utai diempa Iban ari Panggau.
“Pia mega, Daun Sabang Sumpah tu ngembuan tuju dikena nipang jaku enda manah tauka sumpah sida ti bisi datai maya pengawa baka tu,” ku iya sambil madah ranyai nya mega bela ditangkir enggau buah nyiur ti sebaka reti enggau pala munsuh.
Kelimpah ti nitihka rurun pengawa tamat guro, ku iya, iya nirika ranyai nya ketegal ti nangika bala nembiak rebak baru enda nemu reti jalai kepenudi ngintu tamat guro.
“Nyema bisi didirika ba gelanggang bukai, aku mega nangi rurun tauka ripih nirika ranyai tu bisi timpang laban ranyai tu enda baka ranyai bukai, “pia ku iya madah.
Ranyai Kuntau tu mega enda tau direbahka ngapa enti enda direbahka bala guro kuntau.
Pengawa Guro Nyawai tu kemari bela dikemata bala guro bukai baka Guro Dennis Tan, Guro Labang, Guro Selat enggau Guro Philip.
Mejar Anthony Ungop ari 13 Briged, Sabah mega bela enda muai awak tu meda enggau semak agi pengawa tamat kuntau nya.
Sebedau tu, bala nembiak Guro Nyawai belajar kuntau Betawi Laki enggau Spring Tunggal ba pengelama dua minggu.
Bisi mega sekeda ari sida baru tiga hari udah belajar ba iya kelimpah nembiak ke pemadu biak belajar iya nya baru beumur 10 taun.