Program bumai padi paya ba kandang menua Singai disukung
KUCHING: Ex-Kaban Parlimen (MP) tiga penggal ba Mas Gading Patrick Anek Uren nyukung semua peminta digaga perintah nengeri ti deka ngidupka baru program bumai padi paya.
Ku iya, perambu tu ari Kaban Kunsil Nengeri (ADUN) Tasik Biru Dato Henry Harry Jinep rambau simpul Aum Kunsil Nengeri (DUN) apin lama ke udah, endang patut disukung rayat laban tanah paya endang ditemu ami sereta bisi dandang besai di kandang menua Singai dalam pelilih Bau.
“Aku ngeluarka jaku tu nyukung pinta kelebih agi ari ADUN Tasik Biru laban aku chukup rindu lebuh meda Kepala Menteri kitai, Datuk Patinggi Abang Johari Tun Openg, suah udah bejalai ngagai pasar Bau, tetiap kali iya datai enggau projek baka Jematan Buso - Musi enggau Jematan Tondong, sereta perambu Opis Pelilih ke baru.
“Penyuah pejalai iya ngagai Bau nyadika kelai pengiruh iya ba pengawa ngintu pengelatang rayat. Aku ngarapka penerang ari aku deka mai perata ngagai Kepala Menteri kitai lalu iya deka gerah jari ngagihka belanja nengeri ba pengawa ngidupka baru bumai padi ba tanah paya di Singai,” ku iya kemari.
Anek, ke kala dipilih nyadi ADUN Tasik Biru berengkah ari taun 1979 ngagai 1983, madahka kar tanah paya di Singai nyamai dikira datai ke beratus ikar taja nadai kala disukat nentuka pemesai iya ke amat, naka ke diatu.
Iya nyemetak madahka tanah paya tu, kandang beberapa taun ke udah, nadai kala ngelanggang taun dipumai, lalu lebuh nya, iya peranak Singai bisi asil padi kediri empu sereta mayuh kilang injin padi mit digaga dikena nangkup peminta raban orang bumai padi nginjin padi sida nyadi berau.
“Kemaya hari tanah paya tu, ti kala nyadi pemansut pemakai-berau ngagai peranak Singai, udah dilengka. Lalu iya diatu udah repa,” ku iya.
Dikena ngidupka pengawa bumai padi, Anek pechaya tu deka begunaka puku, nyangka dalam RM10 juta, ti deka diatur sekeda raban bekaul nengeri.
Iya ngarapka belanja deka dikena ngaga jalai enggau ngaga baru sistem entali ai di tanah paya tu sereta mega endur ke patut aja.
Anek mega bisi nyebut bumai padi ba tanah paya tu ukai semina ulih ngeluarka berau ungkup guna komuniti di menua tu aja, tang mega ulih meri bekal ngagai guna peranak ke bukai, ulih dijual ba makit.
Iya pechaya pengawa tu ukai semina deka nyediaka mayuh agi penatai pemisi ngagai raban orang bumai tang mega nyaup nengeri tu ngelimat belanja meli berau ari luar, ngagai berau dipansutka tanah paya tu empu.
“Bumai padi paya ulih meri batang kereja ngagai mayuh orang ti nadai kereja.
“Mayuh rayat nadai kereja di enggau ngelingi Singai, lalu penyampau tu majak nambah berindik ari kurang pengawa puang di pasar ketegal ekonomi lubah mansang, balat labuh berindik ari inflasyen niki sereta kuasa beli ba mata duit baruh,” ku Anek, ke diatu diau mendam di Kampung Bobak Sinjanjang.