Bank Darah Sepital Sibu ngelanjarka jam opis ari 8 pagi nyentuk 7 lemai

SIBU: Bank Darah Sepital Sibu ngelanjarka jam opis sida buka iya nya ari 8 pagi ngagai 7 lemai nyentuk 22 Dis tu.

Pemesai ari Bank Darah Sepital Sibu ,Lily Sinta madah, piak sida ngatur jam nya ngambika mensia mayuh lantang datai meri darah sepengudah pulai kereja.

“Kelimpah ari nya, maya malam Krismas (24 Disember), Bank Darah Sepital Sibu mega bisi muka kaunter meri darah ba Delta Mall ari 9.30 pagi nyentuk 2 lemai,” pia ku iya madah.

Ku Lily, penatai mensia mayuh endang semampai dianti dikena nyaup nyeliahka penanggul suntuk bekal darah maya kemisi ujung taun baka tu.

“Naka ke kediatu, semua bansa darah bisi kurang laban orang meri darah enda mayuh lalu diumbaka darah mayuh dikena.

“Kami mega meseti nentuka bekal darah tu chukup laban ti bela nyangkung sepital bukai baka Sarikei, Kanowit, Mukah, Daro, Kapit enggau Saratok,” ku iya nerang.

Iya madah, maya jam kemisi panjai, tebal agi mensia mayuh mulai kediri ke menua ti jauh ari Sibu.

“Ari ke dipeda ngelama tu, kitai bepenanggul ngulihka bekal darah laban mensia mayuh kisuk agi enggau kemisi, Krismas tauka Taun Baru kelimpah sida nadai di Sibu maya tu,” pia ku iya.

Mensia mayuh ti deka nemu penerang silik tau betanya ngagai Bank Darah Sepital Sibu nengah lumur 084238802 tauka 084- 343333 sambung 2010.