17 iku pesereta udah ngulu ‘Kus Teori dan Pratikal Kelas Membuat Roti’
SRI AMAN: Bisi 17 iku raban indu iya nya sida ke ngintu ruang bilik di Sri Aman udah ngulu ‘Kus Teori dan Pratikal Kelas Membuat Roti’ bepalan di Opis Hikmah, Sri Aman semak ditu, pagi kemari.
Pengajar Kus, Kamiza Madeli madahka batang tuju ngatur kus sehari nyentuk dikena bekunsika penemu chara ngaga roti enggau chara ngaga inti roti ari nyiur sereta nyumai sos butterscotch.
Kenu ku iya, tu ukai keterubah kus ke bansa tu diatur di Sri Aman enggau sekeda renggat kus ngaga roti mega udah diatur ditu, sebedau tu.
“Ba renggat kus sekali tu, bisi 17 iku indai orang udah ngambi bagi,” ku iya lebuhka dirandau Utusan Borneo.
Berebak enggau nya, ku iya nambah, pengawa ngatur kus tu diperati ulih mantu sida ke ngintu ruang bilik ditu ngulihka penatai pemisi ari dagang roti.