Kes bebadi jalai alun taun tu bisi kurang 0.7% ari taun 2016
KUCHING: Semua penyampau bebadi jalai alun ke timpuh bulan Januari ngagai November 2017 bisi udah mandangka pengurang ngagai 134 kes tauka 0.7 peratus bebanding enggau timpuh ke sebaka taun siti nyin tadi.
Sapit Kepala Polis Sarawak Dato Pahlawan Mohd Dzuraidi Ibrahim madah, dalam kandang 11 bulan taun tu, urung 18,180 kes bisi di rikod bebanding enggau 18,315 ke taun 2016.
Iya nandu baru madahka, penyampau bebadi jalai alun mandangka bisi kurang ari 353 kes (2016) ngagai 345 kes ke taun tu.
Taja pia, Mohd Dzuraidi madahka kes bebadi ke ngujungka orang nya balat endar bakal dipeda bisi nambah ngagai 202 kes bebanding enggau 158 kes ke di rikod dalam taun 2016.
Mohd Dzuraidi madah munyi nya lebuh dikerandau pengudah ngepunka Ops Selamat ke digaga beserimbai enggau Hari Krismas 2017 di Jalai Batu Kawa, kemari.
Iya nandu baru madahka ari sepiak polis, sida iya deka majakka kaul ke terit enggai ijinsi ke bisi bekait enggau pengangkut, laban beratika pengawa deka ngurangka penyampau bebadi jalai alun di menua tu.
“Kelebih agi maya hari besai, sereta mungkur sekeda endur tauka jalai ke diserumba sitak ke seruran napi penanggul bebadi di jalai alun,” ku iya.
Ba lansa bukai, bekait enggau Ops Selamat ku iya, ba sukut pengelikun jalai alun, Mohd Dzuraidi madah, urung 671 kes bebadi jalai alun bisi di rikod sepemanjai timpuh 18 Disember 2016 ngagai 1 Januari 2017.
Penyampau nya ku iya, bisi udah nurun bebanding enggau taun sebedau nya, iya nya 690 kes tang ngerikod pemati ke sebaka, iya nya dalam 15 iku.
Sebedau nya, Mohd Dzuraidi ba jaku iya bisi madahka dalam kandang Ops Selamat nya digaga dalam kandang 15 hari, deka digulu ulih urung 700 pegawai enggau raban polis bukai.
Sama bisi enggau ngulu atur pengawa nya kemari, Ketuai Opis Tasat enggau Penguasa Trafik Sarawak, Superintenden Alexson Naga Chabu.