Sino-Dayak deka bejalaika tanggungpengawa ti besai ungkup Sarawak
SERIAN: Komuniti SinoDayak di Sarawak ngarapka sida ulih bejalaika tanggungpengawa besai agi dalam nengeri tu.
Presiden Serakup SinoDayak Sarawak, Sebastian Bong madahka komuniti nya, penakan China enggau Dayak, diatu penyampau tubuh sida bisi 200,000 iku.
Iya nyemetak madah, besibil ari mayuh penemu orang, ukai semina dalam ruang bilik nerima kawin enggau bansa pukai, ngujungka mayuh bala anak deka saru penemu pasal adat asal sida.
Ku iya ngenang, bisi leka jaku ke disebut dikena ngemaruhka Sino-Dayak tang mayuh ngetanka nya lalu ba pejalai ngenegap sereta ngenyemakka takah antara ruang bilik sida empu.
“Ari pengawa numbuhka serakup tu, kami deka- ka Sino- Dayaks beratika diri empu nyadika pesaka menua. Nama kebuah pia? Laban sida nyadi peransang ba penyerakup, laban sida nyadi bala anak penakan, ti ulih ngemai dua komuniti begulai.
“Kitai ngarapka SinoDayaks, diatu manggai 200,000 iku, deka ulih digempung dalam siti serakup sereta gawaka penegap politik. Tu Ngambika perintah ulih bejalaika program ti manah ungkup rayat, ke alai Sino- Dayak deka teulihka pemaik,” ku iya rambau pengawa ngelancharka pampang serakup nya di Serian ditu, malam Hari Minggu.
Kaban Kunsil Nengeri ( ADUN) Pelagus enggau Kaban Kunsil Supreme Parti Rakyat Sarawak (PRS) Wilson Nyabong Ijang udah dikangau nyadi temuai dipebasa bejadika pengawa nya ke diatur di Balai Komuniti Serian.
Nyabong, dalam jaku dipansutka iya, minta SinoDayaks gawa rat begulai enggau perintah dikena ngemujurla inisiatif iya kelebih agi ba program ke baru dipejalaika Kepala Menteri Datuk Patinggi Abang Johari Tun Openg.
Ku iya, inisiatif baru tu nyengkaum ekonomi digital, program transformasyen menua pesisir ti ngemeratka pengawa betanam betupi enggau berat agi ungkup Sains, Teknologi, Injinir enggau Matematik (STEM) sereta Latih enggau Pelajar Teknikal enggau Vokasional (TVET).
“Ambika chunto, kitai ulih ngena ekonomi digital ba pengawa e-dagang ngambika ulih nyual asil betanam betupi,” ku iya.
Ku iya, Sarawak nyadika chunto 1Malaysia ke alai kawin champur antara raban etnik nyata ngayanka peranak di nengeri tu ulih diau likun enggau bebaik enggau pangan diri.
Iya udah nya ngemendarka geran penyampau RM15,000 ngagai serakup nya. Sama bisi datai Sekretari Politik Kepala Menteri Charles Chad Nissom sereta bala ketuai komuniti ke bukai.