Mensia mayuh ti nengah patut bejejaga lebuh bekenaka jalai ai
KAPIT: Mensia mayuh ti betengahka jalai ai kelebih agi di Wong Pelagus dipinta bejejaga sereta beratka pengelikun ba gaya hari ke diatu musim pengujan ti ngujungka gelumbang besai enggau ai deras.
Ai wong balat ngeruga pengelikun perengka pengangkut sungai laban peneras ai sereta pengemit alur ai ti ulih ditengah bot mit.
Bisi urung sejam pejalai ngena bot laju 400 hp ari Kapit ngagai Belaga. Kandang beberapa taun ke udah, Perintah Nengeri ngena ‘bahan letupan’ dikena nganchurka batu di seberai sungai, ngarapka ulih ngemanahka agi lupak jalai. Ke amat, nadai entu berubah lalu semampai ngeruga pengelikun.
Urung 350 batu penyauh Batang Rajang di kandang menua tengah Sarawak, mansa Bagi Menua Sarikei, Sibu sereta Kapit enggau mayuh pasar di sepemanjai tebing sungai – Bakun, Belaga, Nanga Sama, Punan Bah, Pila, Nanga Merit, Kapit, Song, Ngemah, Nanga Dap, Kanowit, Durian, Sibu, Bintangor, Sarikei enggau Tanjong Manis ngagai Tasik China Selatan.
Ba taba pala ai pemadu besai di Tekat Ai (HEP) Bakun (2400 MW) enggau HEP Murum (900 MW) lalu ke deka datai, HEP Baleh (1200 MW). Rumah kuasa Sarawak.
Mensia mayuh antara Kapit enggau Belaga, napi pemar sereta pemerinsa nengah Wong Pelagus, laban udah mayuh nyawa bebadi sereta reta lenyau dia.
Taja pia, Wong Pelagus agi kaya enggau ikan sereta undang. Ditu endur orang berikan ngetan pukat, ngulihka Ikan Labang, Ikan Buang, enggau ke bukai.
Dalam tipan jerita taun 1973, penusah besai mangka Pelagus pengujung bulan Oktober, pengudah nembiak Pom Tiga, Peresa Sarawak Junior Certificate ( SJC), Sekula Sekondari ( SMK) Kapit ngatur aktiviti belepa ngagai Pelagus. Perau panjai ti ngemai bala pengajar enggau nembiak, ngelantak batu lalu karam. Bisi 17 iku nembiak ditabanka arus deras.
Sekali agi dalam taun 1980, kapal kargo ‘Bintang Pilai’ mangka gelembung lalu karam. Lebih ari 20 iku orang tambang lenyau. Dataika sehari tu, kapal nya lalu nadai kala ditemu.
Penusah besai agi nyadi dalam taun 2002 lebuh bot 400 hp Opis Residen, dalam pejalai ngagai Belaga karam di Sukat. Sida sebuat mansang ke Belaga, ngulu sebengkah program.
Antara sida ke dibai karam iya nya Sapit Residen Kapit Michael Duk, kerani Dayang sereta bala bukai.
Endang suah didinga bot karam di Pelagus, diatu enggau suba. Tang nadai pengawa ulih digaga ba penyadi asal menua. Ninting taun, pengawa minta berekat enggau miring belalauka pengarap asal Iban enggau adat ti dikemeran endang dikereja belama ngambika nyaga pengikun sida laban semina tu aja jalai pengangkut peranak rumah di menua ili enggau ulu wong.
Bisi 20 kaki ari Kaki Wong ngagai Pala Wong, lebih ari lima kilometer penyauh. Ba semua deriba bot enggau orang tambang, tu pemar ditapi sida, berindik ari gaya nujah batu, ai bebuli sereta peneras ai.
Sebedau bot ekspres tama ngagai ai wong, kesemua jenila enggau pintu ditambit rapit lalu semua orang tambang dipinta ngena jikit pengelikun sereta terenak duduk.
Tuai Rumah John Asun ke diau di rumah panjai di Kaki Wong ngeliska nama baru ari Kaki Wong baka Batu Bangkau, Wong Mawang, Wong Kara, Wong Lapoh, Wong Nabau, Pulau Aur, Wong Batu Karamak/Wong Kawie, Wong Supit, Wong Sukat, Wong Tilan, Wong Batu Boon, Pulau Ambi, Wong Bidai, Wong Panto, Wong Matup, Wong Mecik, Wong Batu Unda, Wong Marom, Wong Lunga enggau Wong Tajau.
Dalam taun 2011, perintah udah ngagihka belanja penyampau RM9 juta dikena ngebum batu dikena ngemesaika lupak pejalai. Taja pia, projek tu enda entu mujur ngelancharka pejalai, tang ngasuh balat agi ngeruga pengelikun laban sebedau ngebum batu ke disebut tadi, abis nadai chara mindah enggau ngetanka tikas peninggi ai diperati. Lebuh batu dibum, iya labuh lalu tenggelam ke dalam ai ngujungka ai majak pabu lalu mar ditengah.
Tetiap atun, peranak rumah panjai di ulu Pelagus deka miring dikereja di Wong Pelagus dataika Batang Rajang dikena ngampun sereta minta dikemataka Petara. Tu dikena nentuka pengelikun sereta berasai lantang maya betengahka Wong Pelagus.
Pengawa miring ti dikereja orang tau jari lalu rengka piring nyengkaum jani, manuk, telu, rendai, asi pulut, tepung, sirih, sungki, rukuk, ketupat lalu dientudika pengawa bebiau enggau nganyang babi.